डिचोली तालुक्यातील कारापूर येथे नदीपात्रात यंदाही मोठ्या प्रमाणात दुर्मीळ मांडोळ्यांचे पीक आले आहे. रुचकर असलेल्या या मांडोळ्या नदीतून काढण्यासाठी सध्या नदीवर खवय्यांची गर्दी उसळत आहे.

कारापूर येथील ‘कोळशेकात्र’ परिसरात या मांडोळ्यांचे अमाप पीक आले आहे. गेल्या कैक वर्षांपासून दरवर्षी कारापूर नदीत हे पीक येते. मध्यंतरी दोन-तीन वर्षे मांडोळ्यां गायब झाल्या होत्या.

नदीत मांडोळ्यांची उत्पती झाल्याचा अंदाज येताच त्या काढण्यासाठी खवय्यांची नदीवर झुंबड उडते. पावसाने कृपा केल्यास साधारण महिनाभर मांडोळ्यांचा मोसम असतो. सध्या मांडोळ्या काढण्यासाठी कारापूरसह सर्वण, बागवाडा आदी भागातील महिलांसह खवय्ये नदीवर गर्दी करीत आहेत.

मांडोळ्यांचे कवच एकदम नाजूक असल्याने मांस वेगळे करताना मोठेसे कष्ट घ्यावे लागत नाही. त्याच्यापासून आंबट-तिखट बनविता येते. मांडोळ्यांचे मांस रुचकर असल्याने खवय्ये त्‍यापासून बनविलेल्या पदार्थाला पसंती देऊन आवडीने आस्वाद घेतात.

दरम्‍यान, मांडोळ्या हा एक शिंपल्यातील प्रकार असून, त्या साधारण तिसऱ्यासारख्याच दिसतात. या मांडोळ्या नदीच्या गाळात रुतलेल्या असतात.

खुब्यांची उत्पती झाली बंद

मांडोळ्यांची उत्पत्ती सुरू झाल्यापासून खुब्यांच्या पिकावर मात्र परिणाम झाला आहे. पंचवीस वर्षांपूर्वी कारापूर नदीत मोठ्या प्रमाणात काळे खुबे पडत होते. मात्र कालांतराने ते बंद झाले आहेत, अशी माहिती जाणकारांकडून देण्‍यात आली. खुब्यांची उत्पत्ती बंद होण्यामागे मांडोळ्या हे एक कारण असू शकते, असाही त्‍यांचा अंदाज आहे.