Gangwar in Colvale Jail कोलवाळ मध्यवर्ती कारागृहात आज, मंगळवारी सकाळी पुन्हा टारझन व कार्बोटकर या कैद्यांच्या दोन गटांत पूर्ववैमनस्यातून राडा झाला. यावेळी तुरुंगाधिकारी आणि पोलिसांनी हस्तक्षेप केल्याने हे प्रकरण चिघळले नाही.

तुरुंगातील या प्रकारावर नियंत्रण ठेवण्यासाठी अतिरिक्त फौजफाटा तैनात केला आहे. कारागृह महानिरीक्षक ओमवीर सिंग बिष्णोई यांनी या घटनेचा अहवाल तुरुंग अधीक्षकांकडून मागविला आहे.

काही वर्षांपूर्वी या कारागृहात अट्टल गुन्हेगार अश्‍पाक बेंग्रे तसेच कारबोटकर यांचा खून झाला होता. त्यावेळी झालेल्या टोळीयुद्धामध्ये कारागृहातील सीसीटीव्ही कॅमेरे फोडून तसेच कारागृहात काळोख करून बेदम मारहाण केल्याने त्यांच्या मृत्यू झाला होता.

या कारागृहात तेथील साधनसुविधा वापरण्यावरून दोन टोळ्यांमध्ये वाद आहेत. त्यामुळे त्यांच्यात असे वारंवार खटके उडत असतात. तुरुंगाधिकाऱ्यांनी प्राथमिक चौकशी करून दोन्ही गटांना ताकीद दिली.

वर्चस्ववादातून तंटे :

काही कैदी स्वतःचे व्हिडिओ काढून ते व्हायरल करतात. गुन्हेगारी पार्श्वभूमी असलेल्या कैद्यांनी आपल्या टोळ्या बनवून त्या सक्रिय केल्या आहेत. आपले वर्चस्व ठेवण्यावरून त्यांच्यात वाद तसेच हाणामाऱ्या होत असल्याने तेथील कायदा व सुव्यवस्था ढासळली आहे.

नेमके काय झाले?

टारझन टोळीतील काही कैद्यांना न्यायालयात जायचे असल्याने ते तयारी करत होते. याचवेळी कारबोटकर गटातील काही कैदी आले. त्यांनी टारझन गटाशी वाद सुरू केला. त्यांच्यातील बाचाबाचीचे रूपांतर हाणामारीमध्ये झाले.

प्रशासन हतबल

कारागृहातूनच काही अट्टल गुन्हेगार बाहेरील जगताशी संपर्क साधून हप्तेवसुली करतात. त्यामुळे कारागृह सुरक्षा यंत्रणाही हतबल झाली आहे. तेथील गुन्हेगारांना नियंत्रणात ठेवणे तुरुंगाधिकाऱ्यांच्या आवाक्याबाहेर गेले आहे.