Sunburn Festival Goa 2024

पणजी: धारगळमध्ये होणाऱ्या सनबर्न महोत्सवाबाबत दोन मतप्रवाह असताना गोवा पर्यटन खात्याने महोत्सवाला तत्वत: मान्यता दिल्याची माहिती पर्यटनमंत्री रोहन खंवटे यांनी दिली आहे. २८ ते ३० डिसेंबर रोजी धारगळमध्ये हा महोत्सव होणार असल्याचे जवळपास निश्चित झाले आहे.

दरवर्षी वागातोर येथे होणारा सनबर्न महोत्सव धारगळमध्ये होणार अशा चर्चा समोर आल्यानंतर धारगळ स्थानिकांनी महोत्सवाला विरोध सुरु केला. काही दिवसानंतर महोत्सवाबाबत परिसरात दोन मतप्रवाह पाहायला मिळाले. दरम्यान, पंचायतीने महोत्सवाला मान्यता देखील दिली. अशात आता पर्यटन खात्याने महोत्सवाला तत्वत: मान्यता दिल्याने सनबर्नचा मार्ग जवळपास मोकळा झाला आहे.

३१ डिसेंबर वगळता २८ ते ३० डिसेंबर रोजी धारगळ येथेच सनबर्न होण्याची दाट शक्यता आहे. दरम्यान, यापूर्वी दक्षिण गोव्यात सनबर्न होणार याबाबत गेल्या सहा महिन्यांपासून चर्चा सुरु होती. सनबर्न आयोजकांनी देखील याबाबत माहिती दिली होती. त्यानंतर महोत्सव धारगळमध्ये होईल, अशी माहिती समोर आली अन् त्याला विरोध सुरु झाला होता.