फोंडा: अवकाळी पावसाने राज्याला झोडपून काढले असून, वादळी वाऱ्यासह पाऊस कोसळत असल्याने पडझड सुरूच आहे. फोंडा तालुक्यात झाडे जमीनदोस्त होण्याबरोबरच वीज खांबही मोडून पडत आहेत. काल (गुरुवारी) सायंकाळी झालेल्या वादळी वारा आणि पावसामुळे शिरोडा, तळावली तसेच अन्य काही भागांत झाडे कोसळली. त्यामुळे दोन घरांचे नुकसान झाले.सायंकाळी अचानकपणे वादळी वारा आणि विजा चमकून पाऊस सुरू झाला. या वादळी वाऱ्याच्या पावसामुळे लोकांची धांदल उडाली.
कामावरून घरी परतणाऱ्या लोकांना अडचणींना सामोरे जावे लागले. शिरोडा भागात आयुर्वेदिक महाविद्यालयाच्या मागे असलेल्या एका घरावर झाड कोसळले. तसेच तळावली भागात मंदिराच्या मागे असलेल्या घरावर झाड कोसळल्याने घराचे नुकसान झाले. काल सायंकाळी अग्निशामक दलाला नऊ कॉल आले. मात्र सर्वाधिक हानी वाळपई भागात झाली. वादळी वाऱ्यामुळे काही ठिकाणी वीज खांब उन्मळून पडले; तर वीजवाहिन्या तुटल्याने वीजपुरवठा खंडित झाला. काही ठिकाणी आंबा, फणस, केळी, पोफळीची झाडे जमीनदोस्त झाली. उशिरा वीजपुरवठा सुरळीत करण्यात आला.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.