पणजी:  सातव्या विधानसभेची मुदत 16 मार्च रोजी संपत आहे. तत्पूर्वी, नवीन विधानसभा अस्तित्वात येणे गरजेचे आहे. यासाठी राज्यपाल पी. एस. श्रीधरन पिल्लई यांनी आपल्या विशेषाधिकारांचा वापर करीत आज मंगळवारी विधानसभेचे विशेष अधिवेशन बोलावले आहे. या अधिवेशनासाठी सावर्डेचे आमदार गणेश गावकर यांची हंगामी सभापती म्हणून निवड केली आहे.

सोमवारी सकाळी राज्यपालांनी गावकर यांना पद आणि गोपनीयतेची शपथ दिली. यावेळी मुख्यमंत्री प्रमोद सावंत, भाजपा प्रदेशाध्यक्ष सदानंद शेट तानावडे, मुख्य सचिव पुनीत कुमार गोयल, विधानसभा सचिव नम्रता उलमन उपस्थित होते.

मंगळवारी सकाळी 11.30 वाजता हे विशेष अधिवेशन होणार आहे. यात प्रामुख्याने राज्यात नव्याने निवडून आलेल्या सर्व आमदारांच्या आमदारकीची शपथ ग्रहण सोहळा होईल. दरम्यान, गोव्‍यात पक्षांतर्गत वाद वाढत असल्याची माहिती सूत्रांनी दिली आहे. यात नेता निवडीबाबतही मतभेद असल्याची चर्चा आहे. या सर्व पार्श्वभूमीवर विधानसभा अस्तित्वात येणे गरजेचे असल्याने राज्यपालांनी अधिकाराचा योग्य वापर करत हे अधिवेशन बोलाविले आहे.

राज्यपालांनी आमदार शपथग्रहण सोहळ्यासाठीच्या विशेष अधिवेशनाकरिता माझी हंगामी सभापती म्हणून नेमणूक केली आहे. मात्र, विधानसभेच्या सभापतीची नेमणूक विधानसभा अस्तित्वात आल्यानंतर विधिमंडळातील सदस्य करतील. सध्या राज्यपालांनी दिलेले काम आपण पार पाडत असून यापुढेही पक्षाने दिलेले काम निष्ठेने करीन.

- गणेश गावकर, हंगामी सभापती