Yellow Alert In Goa

गोव्यात दोन दिवस हलक्या ते मुसळधार पावसाची शक्यता हवामान खात्याने वर्तवली असून, यलो अलर्ट जारी करण्यात आला आहे. या काळात वादळी वाऱ्यासह वीजांचा कडकडाट होण्याची शक्यता असून, नागरिकांनी सतर्क राहण्याचे आवाहन वेधशाळेने केले आहे.

गोवा हवामान खात्याने दिलेल्या माहितीनुसार, गोव्यात आजपासून (१३ मे) ते १५ पर्यंत हलक्या ते मुसळधार पावसाची शक्यता आहे. याकाळात ३० ते ४० किमी प्रतितास वेगाने वारे वाहण्याची शक्यता असून, नागरिकांच्या खुल्या मैदानात अथवा शेतात काम करण्यास टाळावे अशी सूचना हवामान खात्याने दिली आहे.

राज्यात पुढील पाच दिवस तरी कमाल तापमानात बदल होणार नसल्याचे हवामान खात्याने म्हटले असून, पुढील आठवडाभर राज्यातील कमाल तापमान ३३ - ३५ अंश दरम्यानच राहणार आहे.

कोणती काळजी घ्याल?

वादळी वाऱ्यासह पावसाच्या काळात उंच झाडे आणि धोकादायक इमारत अथवा संरचनेजवळ आश्रय घेणे टाळा.

पूरग्रस्त भागात वाहन चालवू नका.

कमकुवत झाडे किंवा भूस्खलन/खडक पडण्याची शक्यता असलेल्या भागात थांबणे टाळा.

ज्या भागात वारंवार पाणी साचण्याच्या समस्येचा सामना करावा लागतो अशा ठिकाणी जाणे टाळा.