Illegal Paragliding At Querim Plateau

मोरजी: केरी येथील पठारावर बेकायदा पॅराग्लायडिंग करणाऱ्या राजू गवंडी (तळवाडा, पेडणे) याला पोलिसांनी ताब्यात घेउन त्याच्याकडून साहित्य जप्त केले. गेल्या महिन्यात या ठिकाणी झालेल्या पॅराग्लायडिंग अपघातात एका पर्यटक युवतीचा मृत्यू झाला होता.

केरी येथील आजोबा मंदिर पठारावर यापूर्वी मोठ्या प्रमाणात बेकायदा पॅराग्लायडिंग पर्यटक करत असल्याचे चित्र दिसून येत होते. या ठिकाणी कसल्याच प्रकारच्या पॅराग्लायडिंग व्यवसायाला परवाने देऊ नयेत, यासाठी केरी ग्रामसभेमध्ये ठरावही मंजूर करण्यात आला होता.

परंतु गेल्या महिन्यात या ठिकाणी बेकायदा पॅराग्लायडिंग करत असताना पुणे येथील एका युवतीला जीव गमवावा लागला होता. त्यानंतर पोलिसांनी याविरोधात धडक मोहीम उघडली होती.

तरीही २७ रोजी राजू गवंडी हा केरी डोंगर पठारावर पॅराग्लायडिंग करत असल्याची तक्रार आल्यानंतर लगेच पर्यटक पोलिसांनी धाव घेत गवंडी याला ताब्यात घेत सर्व साहित्य जप्त केले. तसेच त्याच्या विरोधात गुन्हा नोंदवला.