पणजी: गोव्यातून बेकायदेशीरपणे नेणारी दारू अखेर झारखंडमध्ये पकडण्यात आली. त्याआधी दारू वाहतूक करणाऱ्या ट्रकने महाराष्ट्र व छत्तीसगडची सीमा ओलांडली होती. झारखंडमधील चैनपूर येथे स्थानिक पोलिसांनी ही कारवाई केली.

झारखंडमधील (Jharkhand) चैनपूर येथे स्थानिक पोलिसांनी ही कारवाई केली. चैनपूर हे झारखंडमधील गडवा जिल्ह्याच्या सीमेला लागून असून, छत्तीसगडशी जोडलेले आहे. इतर अमली पदार्थांसारख्या (जसे की अफू किंवा गांजा) तस्करीपेक्षा बेकायदेशीर दारू सामान्यतः अल्प अंतरावर वाहून नेली जाते. मात्र, गोव्यातून बेकायदेशीरपणे दारू आणण्यात आल्याने तेथील पोलिसही चक्रावले आहेत.

उत्तर प्रदेशमध्ये नोंदणीकृत असलेला हा ट्रक मार्गरडहा येथील पेट्रोल पंपाजवळ उभा होता. तपासणीदरम्यान १ हजार २०० बॉक्स सापडले, ज्यामध्ये प्रत्येकी १२ बाटल्यांचा समावेश होता, अशी माहिती चैनपूर पोलिसांनी स्थानिक पत्रकारांना दिली आहे.

या प्रकरणी उत्तर प्रदेशच्या आझमगड येथील जितेंद्र यादव या ट्रकचालकाला पलामू जिल्ह्यातील चैनपूरमध्ये अटक करण्यात आली आहे. त्याच्या ट्रकमध्ये अचानक केलेल्या तपासणीदरम्यान मोठ्या प्रमाणावर बेकायदेशीर दारूचा साठा आढळून आला. हा ट्रक ५ एप्रिल रोजी गोव्यातून निघाला होता आणि महाराष्ट्र (Maharashtra) व छत्तीसगड मार्गे झारखंडमध्ये दाखल झाला.