मोरजी: धारगळ येथील चोणवाडा परिसरातील सर्व्हे क्र. ४७/१ मधील कथित बेकायदा बांधकामाबाबत धारगळ ग्रामपंचायतीकडे स्थानिकांकडून लेखी तक्रार दाखल करण्यात आली असून या प्रकरणाची सध्या तालुक्यात जोरदार चर्चा सुरू झाली आहे.

धारगळ येथील अर्जुन प्रकाश कानोलकर यांनी १८ जुलै रोजी पंचायत सचिवांकडे सादर केलेल्या तक्रारीत, गिरीश शिवराम सिमेपुरुषकर यांनी संबंधित जागेवर अधिकृत परवानगी न घेता घर बांधण्यात आल्याचा आरोप केला आहे.

तक्रारीत असेही म्हटले आहे की, या घरात पेडणेचे आमदार प्रवीण आर्लेकर गेल्या सुमारे पाच वर्षांपासून वास्तव्यास असून संबंधित घर हे आवश्यक तांत्रिक मंजुरी व बांधकाम परवान्याविना उभारले आहे. तक्रारीच्या प्रती पेडणे उपजिल्हाधिकारी, पंचायत संचालनालय (पणजी), बीडीओ (पेडणे) आणि पेडणे पोलिस निरीक्षक यांनाही पाठवल्या आहेत.

आर्लेकरांचा प्रतिक्रियेस नकार

या संदर्भात आमदार प्रवीण आर्लेकर यांच्‍याशी प्रस्‍तुत प्रतिनिधीने संपर्क साधला असता त्‍यांनी प्रतिक्रिया देण्‍यास नकार दिला. सदर तक्रारीबाबत संबंधित ग्रामपंचायत व प्रशासनाकडून पुढे कोणती कार्यवाही केली जाते, याकडे सर्वांचे लक्ष लागले आहे. दरम्यान, गिरीश सीमेपुरुष्कार यांच्याशी संपर्क साधला असता मोबाईल बंद होता.