Mahavatar Narasimha Animation Movie Ashwin Kumar Baluja

आपल्याकडे ज्या पौराणिक कथा सांगितल्या जातात, त्यास अनेकजण मिथक मानतात. परंतु पौराणिक कथा या घडलेल्या आहेत. ती आपली संस्कृती आहे. त्यामुळे मी त्यांना आपला पुरातन इतिहास मानतो, असे मत ‘महावतार नरसिंह’ या ॲनिमेटेट चित्रपटाचे पटकथाकार आणि दिग्दर्शक अश्‍विनकुमार भालुजा यांनी सांगितले.

मला माझ्या संस्कृतीचा, येथील परंपराचा अभिमान आहे. अंधराकडून प्रकाशाकडे जाण्याचा मार्ग त्या दाखवत असल्याने अशा कथांवर आज चित्रपट येणे काळाची गरज आहे. हा चित्रपट ॲनिमेशनवर आधारलेला आहे. त्यामुळे दिग्दर्शक म्हणून जबाबदारी अधिक वाढते. एखाद्याने अभिनय चांगला केला नाही तर चित्रपट खराब ठरतो. परंतु अशा प्रकारच्या चित्रपटाच्या यशापयशाची सर्वस्वी जबाबदारी दिग्दर्शकाची असते, असे भालुजा यांनी सांगितले.

अन्‍य भाषांतूनही चित्रपटाचे प्रदर्शन

ॲनिमेशन आधारित चित्रपट हे केवळ लहान मुलांसाठी असतात अशी एक धारणा आहे. परंतु आता हळुहळू ती धारणा बदलत आहे. जगभरात सर्वत्र विविध प्रकारचे ॲनिमेशन आधारित चित्रपट बनविले जातात आणि ते पाहिलेही जातात. ‘महावतार नरसिंह’ या चित्रपटाला निश्चितपणे चांगला प्रतिसाद लाभणार असून हिंदी, तामिळ आणि इतरही भाषांमध्ये हा चित्रपट प्रदर्शित केला जाणार असल्याचे भालुजा यांनी सांगितले.

श्री महाविष्णूंच्या अवतारांवर आधारीत सिनेमा

अशा प्रकारच्या थ्रीडी ॲनिमेनशनचा चित्रपट अजून भारतात तयार करण्यात आला नव्हता. हा चित्रपट श्री महाविष्णूंच्या दशावतारातील श्री नरसिंह आणि वराह अवतारांवर आधारीत आहे. यासाठी मोठ्या प्रमाणात सं शोधन करून हा चित्रपट मी बनविला आहे. चित्रपटाच्या निर्मितीसाठी विष्णुपुराण, भागवतपुराण व इतर ग्रंथाचा आधार घेतला आहे. या चित्रपटासाठी जेवढी मेहनत घ्यायला हवी, तेवढी घेतली असल्याने आम्हाला चांगला प्रतिसाद लाभेल, असा विश्‍‍वास भालुजा यांनी व्‍यक्त केला.