शिवोली : हुडोवाडा-शिवोली परिसरात घडलेल्या घटनेने स्थानिक नागरिकांना चांगलाच धक्का बसला. येथील एका घराच्या परसात घुसून तांब्याच्या व अॅल्युमिनियमच्या हंड्या चोरताना दोन परप्रांतीय महिलांना स्थानिक रहिवाशांनी रंगेहाथ पकडले.

मिळालेल्या माहितीनुसार, हुडोवाडा येथे दोन महिला एका घरात घुसल्या. तिथे काही वस्तू त्यांनी उचलल्या असे स्थानिकांनी सांगितले. चोरी केलेल्या वस्तूंसह त्या दोघींची चौकशी केल्यावर त्यांनी समाधानकारक उत्तर न दिल्याने महिलांनीच त्यांना दोरखंडाने जवळील झाडाला बांधून ठेवले.

घटनेची माहिती मिळताच शिवोली पोलिसांनी तातडीने घटनास्थळी धाव घेत महिलांना पोलिसांच्या ताब्यात घेतले. या दोन्ही संशयित महिला परप्रांतीय असल्याचे प्राथमिक तपासात समोर आले आहे.

सध्या पोलिसांकडून त्यांच्या ओळखीचा व पूर्वइतिहासाचा तपास सुरू आहे. त्या महिलांचा अन्य कोणत्याही चोरीच्या प्रकरणाशी संबंध आहे का, याचाही शोध घेतला जात आहे. या घटनेनंतर परिसरात नागरिकांनी सतर्क राहण्याचे आवाहन केले असून, संशयास्पद हालचाली दिसल्यास तत्काळ पोलिसांना कळविण्याचे आवाहन स्थानिक ग्रामस्थांनी केले आहे.