Goa Coastal Security: मुंबईवर झालेल्या 26/11 च्या हल्ल्यानंतर देशात सागरी किनारपट्टीची सुरक्षा चर्चेचा विषय झाला होता. त्यानंतर देशाच्या सागरी किनारपट्टीवर अधिक दक्षता घेतली जाऊ लागली होती.

तथापि, गोव्यात आता किनारी पोलिसांकडे गस्तीसाठी नौकाच नसल्याचे समोर आले आहे. विशेष म्हणजे, गेल्या 5 वर्षांपासून पोलिसांकडे नौका नसून गरजेवेळी त्यांना मच्छिमारांची मदत घ्यावी लागत आहे.

गोव्यात राज्याच्या किनारी सुरक्षितेतबाबत ही माहिती समोर आल्यानंतर एकुणच सुरक्षिततेबाबत गंभीर चिंता व्यक्त होत आहे. पोलिस गस्तीसाठी मच्छीमारांचे ट्रॉलर्स, छोट्या होड्या, बोटी यावर अवलंबून असल्याचे दिसून येत आहे.

इतर अत्याधुनिक उपकरणांचीही या पोलिस विभागाकडे कमतरता आहे. सध्या पोलिसांकडे ज्या बोटी आहेत, त्याद्वारे केवळ नद्यांवरच पाळत ठेवता येणे शक्य आहे.

त्यामुळे सध्या जेव्हा पोलिसांना काही कारवाई करायची असते तेव्हा ते मच्छिमार किंवा बंदरांच्या कॅप्टनना बोटींसाठी विनंती करतात. त्यामुळे पोलिसांची कारवाई पुर्णपणे या लोकांच्या मदतीवर अवलंबून आहे.

पोलिसांकडे नौकाच नसेल तर एखादे गुन्हेगारी कृत्य पोलिस रोखणार कसे? त्यामुळे समुद्रातील नियम उल्लंघनावर कारवाई करण्यात पोलिसांना अडचणी येत आहेत. 2012 मध्ये, गोव्यातील सात किनारी पोलीस ठाण्यांमध्ये 12 टनांच्या सात इंटरसेप्टर पेट्रोलिंग बोटी होत्या.

पण त्या सध्या वापरण्यास योग्य नाहीत. राज्याच्या सुरक्षेला प्राधान्य देण्यासाठी गृह खात्यानेच आता यात गांभीर्याने लक्ष देण्याची गरज आहे.