हरमल: येथील खालचावाडा भागात पर्यटनस्थळ असल्याने स्थानिक युवकांनी एकमेकांना रंग लावून होळी उत्सव उत्साहात साजरा केला. त्यांच्याबरोबरीने विदेशी पर्यटकही ‘फेस्टिव्हल ऑफ कलर’मध्ये सामील झाले होते.

यावेळी हरमलचे पंच प्रवीण वायंगणकर, दामोदर नाईक व हरेश मयेकर उपस्थित होते. हरमलात होळी उत्सवानिमित्त 9 दिवस धुळवड साजरी करतात. हरमलच्या मासळी मार्केटमध्ये लोकांनी मासे, मटण व चिकन खरेदीसाठी गर्दी केली होती.

डिचोलीत बालगोपाळांचा उत्साह

ढोल-ताशांचा गजर आणि संगीताच्या तालाचा ठेका धरून एकमेकांवर गुलाल उधळीत डिचोलीतील विविध भागात रंगपंचमी अर्थातच होलीकोत्सव मोठ्या उत्साहात साजरा करण्यात आला. डिचोली शहरासह विर्डी, सर्वण आदी काही ठिकाणी लहान मुलांसमवेत महिलांही या उत्सवात सहभागी झाल्या होत्या. ‘कोविड’मुळे गेल्यावर्षी रंगपंचमीचा मोठासा उत्साह दिसून आला नव्हता.

यंदा मात्र सर्वत्र या उत्सवात शिमग्याचा उत्साह दिसून येत होता. दरम्यान, नोकरी धंद्यानिमित्त डिचोली शहरात वास्तव्य करून राहणारे गोव्याबाहेरील विशेष करून कन्नडीगांतर्फे रंगपंचमी मोठ्या उत्साहात साजरी करण्यात येते. यंदाही कन्नडीगांनी रंगपंचमीचा आनंद लुटला. एकमेकांना होळीच्या शुभेच्छाही देण्यात आल्या.