High Tide Alert in Goa: बिपरजॉय चक्रीवादळाने मॉन्सूनला गतीमान केले. त्यामुळे केरळमधून विक्रमी तीन दिवसातच मॉन्सूनने गोव्यात प्रवेश केला. एरवी मॉन्सूनला केरळमधून गोव्यापर्यंत यायला पाच दिवसांचा तरी कालावधी लागतो.

तथापि, बिपरजॉय वादळामुळे मॉन्सूनची वेगाने प्रगती झाल्याबरोबरच समुद्रही खवळलेला आहे. त्यामुळेच गोव्यात मंगळवारपर्यंत हायटाईडचा इशारा देण्यात आला आहे.

इंडियन नॅशनल सेंटर फॉर ओशन इन्फर्मेशन सर्व्हिसेसने याबाबत गोव्यातील किनारपट्टीवरील नागरिकांना इशारा दिला आहे. बिपरजॉय चक्रीवादळाचा परिणाम पुढील काही काळही जाणवत राहणार आहे. त्यामुळेच गोव्यात मंगळवारपर्यंत हाय टाईडची शक्यता वर्तविण्यात आली आहे.

दरम्यान, संस्थेने छोट्या बोटी समुद्रात नेऊ नयेत, असे म्हटले आहे. आपत्कालीन परिस्थितीसाठी उत्तर गोवा आणि दक्षिण गोवा जिल्ह्यासाठी स्वतंत्र हेल्पलाईन क्रमांकदेखील जारी करण्यात आले आहेत. नागरिक, पर्यटकांना समुद्रात न जाण्याचेही आवाहन करण्यात आले आहे.