डिचोली: मार्गशिर्ष महिना एक पवित्र आणि सुवासिनींसाठी आनंददायी महिना. या महिन्यात येणाऱ्या प्रत्येक गुरुवारी घरोघरी सुवासिनी देवी महालक्ष्मीचे व्रत पाळतात. गुरुवारी (ता.५) मार्गशीर्ष महिन्यातील पहिला गुरुवार असल्याने आज डिचोलीचा (Bicholim) आठवडी बाजार व्रतासाठी लागणाऱ्या वस्तूंनी फुलून गेला होता.

देवी महालक्ष्मीच्या रेडिमेड मूर्तींसह फळाफुलांची खरेदी जोरात सुरू होती. यामुळे पहिल्या गुरुवारच्या पूर्वदिनी बाजारात फळांसह फुलांना तेजी आली होती. सायंकाळी तर फळांच्या खरेदीला जोर आला होता. एकाच दिवशी डिचोलीत फळ (Fruits) आणि फूल विक्रीतून दोन लाखांहून अधिक रुपयांची उलाढाल झाल्याचा अंदाज आहे. फळांना प्रचंड मागणी असतानाही, दर मात्र स्थिर होते. केळी ८० रुपये प्रतिकिलो, सफरचंद २०० ते २५० रुपये, मोसंबी २०० रुपये, डाळींब २०० रुपये प्रतिकिलो असे फळांचे दर होते. पंचफळांना मात्र तेजी आली होती. १०० ते १५० रुपये पंचफळांचा सेट, याप्रमाणे फळे विकण्यात येत होती.

फुलांना मागणी वाढली

महालक्ष्मी व्रताचे महत्त्व लक्षात घेऊन देवीच्या साजशृंगार केलेल्या रेडिमेड मूर्ती बाजारात दाखल झाल्या आहेत. काही दुकानदारांनी या मूर्ती उपलब्ध केल्या आहेत. १०० ते ४०० रुपये मूर्ती असे दर आहेत. या रेडिमेड मूर्तींनाही बाजारात मागणी होती. फुलांनाही मागणी होती. त्यामुळे फुले महाग झाली होती. सायंकाळी तर बाजारातून फुले गायब झाली होती. बहुतेक सुवासिनींनी महालक्ष्मी व्रतासाठी लागणारे साहित्य खरेदी केले असून, व्रतासाठी सुवासिनी सज्ज झाल्या आहेत.