Goa Rain Update : राज्यात 18 व 19 जूनला मेघगर्जनेसह मुसळधार पाऊसाची शक्यता गोवा हवामान विभागाने वर्तविली आहे. याबाबतची माहिती ट्विटरद्वारे दिली आहे. राज्यातील काही ठिकाणी 40 किमी प्रतितास वेगाने वादळी वारे वाहण्याची शक्यताही वर्तविण्यात आली आहे.

भारतीय हवामान खात्याने (IMD) ने व्यक्त केलेल्या अंदाजात म्हटले आहे की, 18 ते 20 जून दरम्यान उत्तर आणि दक्षिण गोवा जिल्ह्यांमध्ये काही ठिकाणी हलका ते मध्यम पाऊस व विजांचा कडकडाटासह 30 ते 40 किमी प्रतितास वेगाने वादळी वारे वाहण्याची शक्यता आहे. तसेच आज काही ठिकाणी मुसळधार पावसाची शक्यता असल्याचे सांगितले आहे.

21 ते 22 जून दरम्यान उत्तर आणि दक्षिण गोवा जिल्ह्यांतील काही ठिकाणी मेघगर्जनेसह मध्यम स्वरुपाचा पाऊस होण्याची शक्यता आहे.

हवामान खात्याने याकाळात नागरिकांना सतर्कतेचा इशारा दिला आहे. वादळ होत असताना खुल्या जागेत आणि शेतात काम करणे टाळा तसेच उंच झाडे आणि उंच मनोऱ्यांखाली आश्रय घेणे टाळा.

विजा आणि सोसाट्याचा वारा असताना विजेचे खांब आणि कमकुवत संरचनांपासून दूर राहा. विद्युत उपकरणे वापरणे टाळा.