वाळपई: मुसळधार पावसामुळे चोर्ला घाटात दररोज झाडे आणि दरडी कोसळण्याचे प्रमाण वाढत आहे. शुक्रवारी (ता.२०) सायंकाळी ४ वा.च्या सुमारास एका झाडासह मातीचा भाग रस्त्यावर कोसळल्यामुळे दोन्ही बाजूंनी वाहतूक कोंडी झाली.

सुदैवाने झाड पडताना रस्त्यावर कोणतीही वाहने किंवा व्यक्ती नसल्यामुळे मोठी हानी टळली. मात्र, झाडासोबत घसरून आलेली माती रस्त्यावर साचल्याने वाहतुकीस अडथळा निर्माण झाला होता.

चोर्लाघाट मार्ग हा बेळगावकडे जाणारा महत्त्वाचा रस्ता असल्याने या मार्गावरून मोठ्या प्रमाणात वाहतूक सुरू असते. झाड कोसळल्यानंतर काही काळ वाहतूक पूर्णपणे ठप्प झाली होती.

घटनेची माहिती मिळताच डिचोली वाहतूक पोलिसांनी तत्काळ घटनास्थळी धाव घेतली. वाहतूक पोलिस सेलचे इन्चार्ज किशोर आमोणकर यांच्या मार्गदर्शनाखाली जेसीबीच्या साहाय्याने झाड रस्त्यावरून हटवून रस्त्यावर साचलेली मातीही तातडीने हटविली.