दक्षिण गोवा जिल्हा इस्पितळात येत्या ४-५ महिन्यांत कार्डिओलॉजी, न्युरॉलॉजी, ऑर्थोपेडिक तसेच रक्त तपासणी विभाग सुरू करण्यात येईल, अशी माहिती आरोग्यमंत्री विश्वजीत राणे यांनी मडगावात दिली. मंत्री राणे यांनी शुक्रवारी या इस्पितळाला आकस्मिक भेट दिली. त्यावेळी त्यांनी वेगवेगळ्या विभागांची पाहणी केली आणि डॉक्टर व इतर कर्मचाऱ्यांच्या समस्या जाणून घेतल्या.

येथे दररोज ६०० ते ७०० रुग्ण ओपीडीत व इतर तपासणीसाठी येतात. त्यांना योग्य सुविधा पुरविण्याचा प्रयत्न असेल. रुग्णांच्या खाण्या-पिण्याची सोयसुद्धा करण्याचा आमचा मानस असल्याचे त्यांनी सांगितले. या पाहणीनंतर मंत्री राणे म्हणाले की, यासंदर्भात मी मुख्यमंत्र्यांशी बोलणार आहे. मंत्र्यांच्या या भेटीविषयी मडगावातील युवा नेते प्रभव नायक म्हणाले की, आम्हाला आशा आहे की, जिल्हा इस्पितळात अत्यंत गरजेचे आयसीयू, ट्रॉमा युनिट, कॅथ लॅब आणि न्यूरो युनिट लवकरच कार्यान्वित केले जाईल.

- विश्‍वजीत राणे, आरोग्यमंत्री

दक्षिण गोव्यातील लोकांना उपचारासाठी गोमेकॉत जाण्याची वेळ येऊ नये, यासाठी विविध सुविधा उपलब्ध करण्यात येणार आहेत. या इस्पितळाला भेट देणार, असे मी विधानसभेतच सांगितले होते. त्याप्रमाणे गाजावाजा न करता मी येथे आलो आणि डॉक्टर-कर्मचाऱ्यांशी बोललो. किती डॉक्टरांची कमतरता भासते, याची माहिती जाणून घेतली.