Ponda ID Hospital Dr. D'Souza Suspended: फोंडा येथील आयडी उपजिल्हा रुग्णालयातील डॉ. रुबेन डिसोझा यांना रुग्णांच्या तक्रारीवरून निलंबित केले आहे.

यासंबंधी अधिकच्या चौकशीचे आदेश दिले आहेत. यामध्ये ते दोषी आढळल्यास त्यांना सेवेतून बडतर्फ करण्यात येईल, अशी माहिती आरोग्यमंत्री विश्‍वजीत राणे यांनी दिली.

‘डॉ. डिसोझा यांच्याबाबत रुग्णांकडून अनेक तक्रारी आल्या आहेत. यामुळेच खात्याच्या संचालक डॉ. गीता काकोडकर यांना डॉ. डिसूझा यांच्या निलंबनाचे आदेश दिले आहेत. यासंबंधीचे फाईल अवर सचिवांकडे पाठवण्यात आली असून या प्रकरणांमध्ये ते दोषी आढळल्यास त्यांना सेवेतून बडतर्फ केले जाईल’, असे राणे यांनी सांगितले.

भारतीय लष्करी सेवेत डॉक्टर म्हणून काम करून निवृत्त झाल्यानंतर डॉ. डिसोझा राज्य सरकारच्या फोंड्यातील आयडी उपजिल्हा इस्पितळात दीड वर्षांपूर्वी रुजू झाले होते.

शस्त्रक्रियेसाठी रुग्णांच्या नातेवाईकाकडे पैसे मागण्याचा प्रकार त्यांच्याकडून होत असल्याचा आरोप होत आहे. यासंबंधी वरिष्ठांकडे तक्रारीही करण्यात आल्या होत्या.