Mumbai To Goa Flight: मुंबईमधून गोव्यात येणारे विमान तब्बल सात तास लेट झाले आहे. दुपारी तीन वाजता उड्डाण करणारे विमान अद्याप मुंबईमध्ये असून, मागील तास तासांपासून हे विमानतळावर प्रवाशी खोळंबून पडले आहेत.

स्पाईसजेट कंपनीचे (Spicejet Company) विमान मुंबईमधून गोव्यासाठी उड्डाण करणार होते. दरम्यान, दुपारी तीन वाजल्यापासून विमानाच्या वेळेत वारंवार बदल केला जात आहे. सात तास उलटून गेले तरी विमानाने अद्याप गोव्यात येण्यासाठी उड्डाण घेतलेले नाही.

(Mumbai To Goa Flight of Spicejet delayed by seven hours)

मिळालेल्या माहितीनुसार, स्पाईसजेट कंपनीचे विमान मुंबईमधून आज (शुक्रवार, दि.20) गोव्यात येणार होते. दुपारी तीन वाजता हे विमान विमानतळावरून सुटणार असे प्रवाशांना सांगितले होते. दरम्यान, प्रवासी विमानतळावर पोहोचले मात्र, विमानाचे उड्डाण झाले नाही. मागील तब्बल सात तासांपासून या विमानाचे उड्डाण खोळंबून आहे.

विमानाच्या उड्डाणासाठी उशीर का होत आहे याबाबत अद्याप काहीही माहिती समोर आलेली नाही. प्रवाशांनी मात्र विविध माध्यमातून कंपनी विरोधात रोष व्यक्त करण्यास सुरूवात केली आहे. अनेकांनी ट्विटरच्या माध्यामातून कंपनीच्या व्यवस्थापनावर टीका केली आहे.

विमानाचे उड्डाण अद्याप झाले नसल्याने प्रवाशांनी मुंबई विमानतळावर आपला संताप व्यक्त केला. तसेच, कंपनीला धारेवर धरले. काही प्रवाशांनी विमान उशीरा झाल्याने ज्या सुविधा प्रवाशांना देणे अपेक्षित आहे त्या दिल्या जात नसल्याचा आरोप केला आहे. तसेच, काही जणांनी कंपनीला प्रवाशांच्या वेळेची किंमत नसल्याचा देखील आरोप केला आहे.