डिचोली: सर्वत्र चतुर्थीचा उत्साह संचारला असतानाच, सर्वण येथे लोकवस्ती जवळच गवताच्या गंजीला आग लागून हजारो रुपयांचे नुकसान झाले. तर अग्निशामक दलाच्या जवानांनी वेळीच मदतकार्य करून आग नियंत्रणात आणल्याने मोठी आपत्ती टळली. आग नियंत्रणात आणण्यासाठी दोन बंब पाचारण करावे लागले. तब्बल तीन तास शर्थीचे प्रयत्न करून आग विझवण्यात आली. मदतकार्यात स्थानिकांनीही भाग घेतला.

(Haystack fire reported at Sarvan caused loss of thousands of rupees)

ही घटना सर्वण येथे रविवारी ता.4 रोजी सकाळी नऊ वाजण्याच्या सुमारास घडली. ही आग नेमकी कशी लागली ते समजू शकले नाही. मात्र फटाक्यामुळे ही घटना घडल्याचा अंदाज आहे. सर्वण-एकतानगर परिसरातील शाणू सावंत आणि कुटुंबीयांनी गुरांची व्यवस्था म्हणून मोठ्या प्रमाणात गवताचा साठा करून ठेवला होता. मात्र गवत जळाल्याने शाणू सावंत यांच्यासमोर गुरांच्या खावडीचा प्रश्न निर्माण झाला आहे.

रविवारी सकाळी या गवतातून धूर येत असल्याचे निदर्शनास येताच डिचोली अग्निशामक दलाला कळविण्यात आले. दलाचे अधिकारी शैलेश गावडे यांच्या मार्गदर्शनाखाली आणि लिडींग फायर फायटर व्ही. गावकर यांच्या नेतृत्वाखाली चालक संदीप परब, नरेश गावकर, लवींदर साळगावकर आणि सुनील गावस या दलाच्या जवानांनी घटनास्थळी धाव घेऊन आग नियंत्रणात आणली. गवत दूर करण्यासाठी जेसीबीही मदत घेण्यात आली.