Harmal News : हरमल, नववर्ष स्वागतासाठी पर्यटकांची प्रचंड गर्दी उसळली आहे. त्यामुळे रस्ता वाहतुकीवरही ताण आला असून ठिकठिकाणी वाहतूक कोंडीचे प्रकार घडत आहेत. यामुळे पोलिसांची बरीच धावपळ उडाली आहे.

दरम्यान, येथील कार्मेल चर्च मैदानावर कार गाड्या पार्क करण्याची सोय केल्याने किनाऱ्यावर होणारी वाहनांची कोंडी टळल्याचे दिसून आले. परंतु वाहनांची संख्या वाढल्याने पार्किंगसाठी जागा अपुरी पडू लागली आहे. रात्री उशिरापर्यंत रस्त्यांवर वाहनांच्या रांगा दिसून येत होत्या. पेडणे वाहतूक निरीक्षक विश्वजित चोडणकर वाहतुकीवर नजर ठेवून होते.

पर्यटकांची गोची...

येथील बहुतेक गेस्ट हाऊसेस व हॉटेल्स फुल्ल झाल्याने अनेकांनी आपल्या वाहनात विश्रांती घेण्याची सोय केल्याचे दिसून आले. हॉटेल्स आधीच ऑनलाइन पद्धतीने बुक झाल्याने अखेरच्या क्षणी पोचलेल्या पर्यटकांना पायपीट करावी लागली.

इंटरनेट स्लो, एटीएमवर गर्दी

वाढलेल्या पर्यटकांचा परिणाम येथील इंटरनेट सेवेवर देखील झाला आहे. गेले दोन दिवस ही सुविधा खूपच स्लो झाल्याने संपर्क साधणे कठीण झाले आहे. व्यावसायिकांना लोकेशन पाठवणे शक्य न झाल्याने अनेकांना रस्त्यावर तात्कळत राहावे लागले.

त्यामुळेही वाहतूक कोंडीचे प्रकार घडले. दरम्यान, येथील एटीएम बाहेर पर्यटकांच्या मोठ्या रांगा दिसून आल्या. मात्र अनेकांनी जीपे, पेटीएमसारख्या सुविधांचा लाभ घेतल्याने रोखीने व्यवहार कमी झाल्याचे व्यावसायिक अरुण पेडणेकर यांनी सांगितले.