Goa News: राज्यात सध्या युद्धपातळीवर रेल्वे दुपदरीकरणाचे काम सुरू आहे. यासाठी सावर्डे येथील झुवारी नदीवर पूल बांधला असून तो उभारण्यासाठी नदीत मोठ्या प्रमाणात मातीचा भराव टाकण्‍यात आला आहे. त्‍यामुळे अर्धी नदी मातीने बुजून गेली असून येणाऱ्या दिवसांत या नदीच्‍या काठी वसलेल्या गावांना धोका निर्माण झाला आहे.

सर्व कायदे आणि नियम ढाब्यावर बसवून कामराळ येथे रेल्वे ट्रॅक घालण्यासाठी सखल भाग भरून काढण्यात आला आहे. दुपदरीकरणासाठी सुरू असलेली ही धावपळ पर्यावरणाचा विध्वंस करण्यास कारणीभूत ठरण्याची शक्यता व्यक्त केली जात आहे.

या कामाला काही ठिकाणी जोरदार विरोध होत आहे. हा विरोध कुडचडेत होऊ नये म्हणून घाईघाईने काम सुरू आहे. दर दिवशी शेकडो ट्रक माती आणून घातली जात आहे व ही माती कुठून आणली जात आहे हे गुपित मात्र अद्याप उलगडले नाही.

सदर काम जरी रेल्वेच्या जागेत होत असले तरीही त्याचे परिणाम कुडचडेतील सावर्डे नदीकाठच्या मिराबाग, माडेल, धडे, कामराळ या गावांना भोगावे लागणार आहेत.

धडे येथील जुन्या पुलाजवळ समांतर पूल उभारला असून तो जमिनीपासून बराच उंच असल्याने रेल्वे ट्रॅक घालण्यासाठी मातीचा भराव घातला गेला आहे. ही माती खाली जाऊ नये म्हणून अर्धीच संरक्षक भिंत उभारली असून पावसाळ्यात भरावाची माती सखल भागात जाण्याचा धोका निर्माण झाला असल्याचे लोकांचे म्हणणे आहे.

जर ही माती कोसळून खाली आली तर लोकांच्या बागायतींचे नुकसान होणार आहे. सुमारे चौदा ते पंधरा मीटरचा सखल भाग मातीने भरून काढण्यात आल्यामुळे पावसाचे पाणी वाहून जाण्याचे सर्व नैसर्गिक मार्ग बंद झालेले आहेत.

सूत्रांकडुन मिळालेल्या माहितीनुसार, सुमारे तीन हजार मेट्रिक टन माती या कामासाठी वापरण्यात आली आहे. मातीचा भराव जुवारी नदीच्या काठापर्यत पोचला आले.

रेल्‍वेची दंडेलशाही पर्यावरणावर शेकणार!

रेल्वेच्या कामात अडथळा आणल्यास कायदेशीर करवाई केली जाते अशी भीती लोकांमध्ये पसरली आहे. मातीचा भराव टाकून नेमके काय केले जात आहे याची कोणतीही कल्पना स्थानिकांना नाही.

तसेच कोणतीही जनसुनावणी न घेता सखल भाग भरून काढला जात आहे. पर्यावरणावरील परिणामांची काहीच माहिती लोकांना देण्यात आलेली नाही. रेल्वेकडून सुरू असलेल्या या दंडेलशाहीचे परिणाम पर्यावरणावर होण्याची भीती लोकांना सतावू लागली आहे.