Guirdolim Illegal Hill Cutting

सासष्टी: सासष्टी तालुक्यातील गिरदोली गावात बेकायदेशीरपणे डोंगरकापणी व रस्ता तयार करण्याचे काम सुरू आहे. पंचायतीतर्फे या भागाची पाहणी करण्यात आली व कडक कारवाई करण्‍याचा निर्णय घेण्‍यात आला.

सरपंच सोनिया फर्नांडिस यांनी सांगितले की, आम्ही याबाबत नगरनियोजन खात्याला व जिल्हाधिकाऱ्यांना पत्र लिहून माहिती दिली आहे. जिल्हाधिकाऱ्यानी मामलेदारांना कारवाई करण्यास सांगितले आहे.

येत्या एक-दोन दिवसांत कारवाई झाली नाही तर आम्ही परत एकदा नगरनियोजन खात्याकडे तक्रार करणार आहोत. पंचायतीने कारवाई करावी असे मामलेदारांनी आम्हाला पत्र पाठविले आहे.

पंच फ्रॅंकी रॉड्रिगीस यांनी सांगितले की, आम्ही या भागाची कित्येकदा पाहणी केली, नगरनियोजन खात्याकडे तक्रार केली. पोलिसांना कळविले तरी काही होत नाही. पोलिस म्हणतात हे त्यांचे काम नाही. येथे रानटी जनावरांबरोबर ससे व अनेक प्रकारेचे पक्षीही आहेत. जर डोंगरकापणी झाली तर या प्राण्यांनी कुठे जायचे?