पणजी: भारतीय वैद्यकीय संघटना गोवा शाखा, गोवा कर्करोग सोसायटी व गोवा चेंबर ऑफ कॉमर्स या तिन्ही संस्था जनतेच्या हितासाठी कठोर परिश्रम घेत आहेत. राजभवनद्वारे जेवढी मदत करणे शक्य आहे, तेवढी करण्याचा प्रयत्न आम्ही करू. या उपक्रमाला माझ्या शुभेच्छा असल्याचे राज्यपाल पी. एस. श्रीधरन पिल्लई यांनी सांगितले. जीसीसीआयच्या सुरेंद्र तिबलो सभागृहात भारतीय वैद्यकीय संघटना, गोवा शाखा आणि कर्करोग सोसायटी यांच्या कार्याची दखल घेत राजभवनद्वारे धनादेश देण्यासाठी कार्यक्रमाचे आयोजन करण्यात आले होते.

डॉ. शेखर साळकर म्हणाले, राज्यपालांकडून जो निधी देण्यात आला आहे. त्याचा योग्य तो वापर केला जाईल. त्यांनी कर्करोगासंबंधी भारतीय वैद्यकीय संघटना व मणिपाल हॉस्पिटल देत असलेल्या सुविधांबद्दल भाष्य केले.

भारतीय वैद्यकीय संघटनेच्या गोवा शाखेचे अध्यक्ष रूफिनो मोंतेरो म्हणाले, गोव्यातील युवावर्ग परदेशात जात असल्याने घरी असणाऱ्या जेष्ठांकडे लक्ष देणे गरजेचे आहे. आमच्या संघटनेकडून आरोग्य तसेच मानसिक पाठबळ देण्याचा आम्ही प्रयत्न करू असे त्यांनी सांगितले. महेंद्र कुडचडकर, विश्‍वनाथ माशेलकर, मेधा साळकर, बबिता आंगले, मनोज प्रभुदेसाई, इंदु ठाकूर आदींनी गोव्यातील भारतीय वैद्यकीय संघटनेच्या विविध शाखांच्या वतीने धनादेश स्विकारले.