फोंडा: गोव्यातील फोंडा शहरात एका नामांकित सराफी शॉपमध्ये मोठी चोरी झाल्याची धक्कादायक घटना उघडकीस आली आहे. दुकानातील तब्बल १ कोटी १४ लाख रुपये किमतीचे सोन्याचे दागिने लंपास करण्यात आले असून, याप्रकरणामुळे संपूर्ण परिसरात खळबळ उडाली आहे. विशेष म्हणजे, ही चोरी बाहेरील व्यक्तीने केली नसून दुकानाशी संबंधित असलेल्या दोन संशयित व्यक्तींनीच केल्याचा प्राथमिक अंदाज पोलिसांनी वर्तवला आहे.

दागिन्यांची चोरी

मिळालेल्या माहितीनुसार, २६ मार्चपूर्वी ही चोरी झाल्याचे समोर आले आहे. दुकानातील साठ्याची तपासणी केली असता, सुमारे ६९५ ग्रॅम वजनाचे सोन्याचे दागिने गायब असल्याचे मालकाच्या निदर्शनास आले. ज्या दागिन्यांची चोरी झाली आहे, त्यांची बाजारभावाप्रमाणे किंमत १ कोटी १४ लाख रुपये इतकी आहे. चोरीच्या या घटनेनंतर ज्वेलरी शॉपच्या मालकाने तातडीने पोलिसांत धाव घेत तक्रार दाखल केली.

कर्मचाऱ्यांवरच संशय

या प्रकरणातील सर्वात धक्कादायक बाब म्हणजे, चोरीची पद्धत पाहता यामध्ये दुकानातील किंवा दुकानाशी संबंधित असलेल्या दोन व्यक्तींचा हात असण्याची शक्यता पोलिसांनी व्यक्त केली आहे. सीसीटीव्ही फुटेज आणि दुकानातील व्यवहारांची पडताळणी केल्यानंतर पोलिसांना काही संशयास्पद धागेदोरे मिळाले आहेत.

पोलीस तपास

फोंडा पोलीस ठाण्यात याप्रकरणी भारतीय दंड संहितेच्या संबंधित कलमान्वये गुन्हा (FIR) दाखल करण्यात आला आहे. घटनेचे गांभीर्य ओळखून पोलिसांनी तपासाची चक्रे वेगाने फिरवली आहेत. ठसेतज्ज्ञ आणि फॉरेन्सिक टीमनेही घटनास्थळी भेट देऊन नमुने गोळा केले आहेत. अद्याप याप्रकरणी कोणालाही अटक करण्यात आलेली नाही, मात्र संशयितांची चौकशी सुरू असून पोलीस त्यांच्या मागावर आहेत.