Mahadayi Water Issue: केंद्रीय जल आयोगाने कर्नाटकच्या नव्या डीपीआरला दिलेल्या मंजुरीनंतर गोव्यात त्याचे तीव्र पडसाद उमटले आहेत. त्यामुळे म्हादई नदीच्या पाण्याचा प्रश्न पुन्हा चर्चेत आला आहे. दरम्यान, या प्रश्नावर राज्यातील सर्व मंत्र्यांसह केंद्रीय गृहमंत्री अमित शाह यांची भेट घेणार असल्याचे सांगितले होते. तत्पुर्वी राज्याचे जलस्त्रोत मंत्री सुभाष शिरोडकर यांनी भोपाळ येथे केंद्रीय जलशक्ती मंत्री गजेंद्रसिंग शेखावत यांची भेट घेतली.

मंत्री सुभाष शिरोडकर हे सध्या भोपाळमध्ये आहेत. भोपाळमध्ये 'वॉटर व्हिजन 2047' या नावाने पहिली परिषद होत आहे. या परिषदेत देशातील सर्व राज्यांचे मंत्री सहभागी झाले आहेत. याच परिषदेवेळी सुभाष शिरोडकर यांनी केंद्रीय जलशक्ती मंत्री गजेंद्रसिंग शेखावत यांची भेट घेतली.

शिरोडकर यांनी शेखावत यांना निवेदन दिले आहे. त्यात केंद्रीय जल आयोगाने कर्नाटकच्या नव्या डीपीआरला दिलेल्या तांत्रिक मंजुरीला त्यांनी विरोध दर्शविला आहे. तसेच या प्रकरणात गोव्याची भूमिका त्यांनी केंद्रीय मंत्र्यांच्या कानावर घातल्याचे समजते.