एमव्हीआर इन्फ्रा प्रा. लि. या कंत्राटदाराची ख्याती निकृष्ट दर्जाच्या रस्त्यांसाठी, भ्रष्टाचारासाठी आणि अनेक लोकांचे प्राण संकटात घालण्यासाठी झाली आहे. तरीही, भाजप सरकारच्या संरक्षणाखाली एमव्हीआर इन्फ्रा बिनधास्तपणे काम करत आहे, असे म्हणत गोवा प्रदेश काँग्रेस कमिटीने एमव्हीआर कंत्राटदाराच्या बेफिकिरीचा आणि जीवघेण्या निष्काळजीपणाचा निषेध केला.

एमव्हीआर इन्फ्राने झुआरी IAV प्रा. लि. च्या इंधन वाहिनीला हानी पोहोचवली, ज्यामुळे हजारो गोमंतकीयांच्या जिवाला धोका निर्माण झाला. एका मोठ्या स्फोटाची शक्यता होती, मात्र सरकार आणि प्रशासनाने कोणतीही कारवाई केली नाही.

एमव्हीआर इन्फ्राला अनेक वेळा तंबी दिली होती, तरीही त्यांनी निष्काळजीपणा सुरूच ठेवला. अशा परिस्थितीतही कोणतीही कारवाई का करण्यात आली नाही? याचे कारण एमव्हीआर इन्फ्राला मुख्यमंत्री प्रमोद सावंत आणि भाजप सरकारचे संरक्षण असून, हा कंत्राटदार भाजपचा जावई आहे! अशी टीका काँग्रेसने केली आहे.

केंद्रीय रस्ते वाहतूक व महामार्ग मंत्री नितीन गडकरी या जीवघेण्या कंत्राटदाराला अजून किती काळ वाचवणार? किती जणांचे प्राण गेले की सरकारला जाग येणार? असा सवाल काँग्रेसने उपस्थित केला आहे.

काँग्रेसच्या प्रमुख मागण्या:

- एमव्हीआर इन्फ्राला कायमस्वरूपी ब्लॅकलिस्ट करावे आणि त्यांचे सर्व कंत्राटे रद्द करावेत.

- हजारो लोकांचे प्राण धोक्यात घालणाऱ्या एमव्हीआर इन्फ्रावर फौजदारी गुन्हा दाखल करावा.

- त्यांच्या वारंवार केलेल्या निष्काळजीपणाची सखोल चौकशी करावी.

- भाजप नेते आणि सरकारी अधिकाऱ्यांनी एमव्हीआरला दिलेले संरक्षण तात्काळ बंद करावे आणि जबाबदारी निश्चित करावी.