पणजी: यंदा गोव्यात मार्चमध्ये 34.2 अंश सेल्सिअस एवढ्या कमाल तापमानाची नोंद झाली आहे. 2013 नंतरचे मार्च महिन्यातील हे सर्वाधिक तापमान आहे. त्यावेळी सर्वाधिक 34.6 एवढ्या तापमानाची नोंद होती असे वेधशाळेने सांगितले. (goan people experiences second hottest march since 2013)

दरम्यान, शनिवारपासून राज्यातील काही भागात ढगाळ वातावरण आहे. शनिवारी पणजी (Panaji) येथे कमाल 33.3 तर किमान25.5 अंश सेल्सिअस तापमानाची नोंद झाली. गेल्या आठवड्यात पडलेल्या अवकाळी पावसानंतर (Rain) आता तापमानात वाढू लागले आहे. दुपारच्‍या वेळी तर घराबाहेर पडणे कठीण बनले आहे. उकाड्यापासून गारवा मिळावा यासाठी लोक शहाळे, ऊसाचा रस, विविध फळांचे रस, शीतपेये, आयस्क्रीमला (Ice cream) प्राधान्य देत आहेत.

पावसाची शक्यता

येत्या 4 एप्रिलपर्यंत गोवा-कर्नाटक प्रदेशात पूर्वेकडील वाऱ्यांसह कमी दाबाचा पट्टा निर्माण होण्याची शक्यता आहे. यामुळे 4 आणि 5 एप्रिल रोजी राज्यात एक -दोन ठिकाणी मेघगर्जनेसह पाऊस पडण्याचा अंदाज वर्तविण्यात आला आहे.