Goa Youth Congress Campaign

मडगाव: तरुणांमधील बेरोजगारी आणि अंमली पदार्थांचे व्यसन दूर करण्यासाठी गोवा प्रदेश युवक काँग्रेसच्या वतीने ‘नोकरी दो, नशा नाही' या मोहिमेचा शुभारंभ सोमवारी करण्यात आला. यावेळी उत्तर गोवा जिल्हाध्यक्ष रिनाल्डो रुझारियो, युवा नेत्या देवसुरभी यदुवंशी, उमर तांबुली आदी उपस्थित होते.

या कार्यक्रमादरम्यान रिनाल्डो रुझारिओ यांनी दरवर्षी दोन कोटी रोजगार निर्मितीचे आश्वासन पूर्ण करण्यात भाजप सरकार अपयशी ठरल्याची टीका केली.

भाजप सरकार नोकऱ्या विकण्यात गुंतले आहे, हे लज्जास्पद आहे. यामुळे पात्र उमेदवारांना नोकरी मिळण्यापासून वंचित राहावे लागते. आपण एकजूट होउन आणि याविरोधात आवाज उठवून हे प्रकार थांबवण्याची गरज आहे, असे रिनाल्डो रुझारिओ म्हणाले.

गोव्यातील व्यवसाय आणि इतर छोटे व्यवसाय सरकारने उद्ध्वस्त केले आहेत. ते सर्व बाबतीत अपयशी ठरले असून रोजगार उपलब्ध करून देण्यात सपशेल अपयशी ठरले आहे असे ते म्हणाले. देवसुरभी यदुवंशी यांनीही भाजप सरकार नोकऱ्या देण्यात अपयशी ठरल्याची टीका केली. ‘‘गोव्याच्या कानाकोपऱ्यात अंमली पदार्थ पोहोचले असून तरुणांना त्याचे व्यसन लागले आहे. तरुणांना चांगले भवितव्य देण्यासाठी आपण अंमली पदार्थांचे प्रकार नेस्तनाबूत केले पाहिजे, असे त्या म्हणाल्या.