Goa Pradesh Youth Congress : देशासह गोव्यात बेरोजगारीची समस्या आहे. भाजप सरकार नोकऱ्या देण्यात अपयशी ठरले असून तरुणांनी ‘बेहतर भारत की बुनियाद’ या कार्यक्रमात सहभागी व्हावे आणि देशातून द्वेषपूर्ण राजकारण पुसून टाकण्यास मदत करावी,” असे आवाहन गोवा प्रदेश युवक काँग्रेसचे अध्यक्ष जोएल आंद्राद्र यांनी केले.

गोवा प्रदेश युवक काँग्रेसच्यावतीने गुरुवारी पत्रकार परिषदेचे आयोजन करण्यात आले होते. यावेळी सरचिटणीस अहराज मुल्ला, दक्षिण गोवा जिल्हाध्यक्ष महेश नादर, सोशल मीडिया प्रभारी देवसुरबी यदुवंशी उपस्थित होते.

आंद्राद्र म्हणाले, "देशातील युवक द्वेष आणि विभाजनाचे राजकारण नष्ट करून बदल घडवू पाहत आहेत. आपला देश आर्थिक, सामाजिक व राजकीय आव्हानांचा सामना करत आहे. 10 ते 12 जुलै दरम्यान बेंगळुरू येथे ‘बेहतर भारत की बुनियाद’ अधिवेशन होणार असून, त्यात युवक काँग्रेसचे सदस्य सहभागी होणार आहेत असे आंद्राद यांनी सांगितले.

सरचिटणीस अहराज मुल्ला म्हणाले की, "देशात शांतता प्रस्थापित करण्यासाठी मजबूत पाया आवश्यक आहे. त्यासाठी अधिवेशनात अनेक मुद्द्यांवर चर्चा केली जाईल. या अधिवेशनापूर्वी आम्ही गोव्यात स्थानिक चर्चा करून हा प्रश्न समजून घेऊन तो सोडवण्यासाठी अधिवेशनाला उपस्थित राहू,” असे मुल्ला म्हणाले.

सोशल मीडिया प्रभारी देवसुरबी यदुवंशी यांनी युवकांना काँग्रेसच्या सोशल मीडिया प्लॅटफॉर्ममध्ये सामील होण्याचे आवाहन केले.