Yatish Naik: राज्यपाल पी. एस. श्रीधरन पिल्लई यांच्या गोवा ग्राम संपूर्ण यात्रेच्या आयोजित कार्यक्रमात विरोधी पक्षनेत्यांनी काल राजभवनात केलेल्या निराधार आणि बिनबुडाच्या आरोपांचा भाजप निषेध करत असून त्यांच्या अशाप्रकारच्या वक्तव्यातून काँग्रेसची निराशा दिसून येत असल्याचे भाजपचे प्रवक्ते यतिश नायक यांनी म्हटले आहे.

कॉंग्रेस प्रदेशाध्यक्षांनी देखील मुख्यमंत्री डॉ. प्रमोद सावंत राज्यपालांच्या कार्यक्रमाला उपस्थित न राहिल्यामुळे टीका केली ती चुकीची आहे. कारण मुख्यमंत्री दिल्लीत होते. त्यांच्या पूर्वनियोजित प्रचार कार्यक्रमांमुळे ते उपस्थित राहू शकले नाहीत, यतिश नायक म्हणाले.

केंद्रातील पंतप्रधान नरेंद्र मोदी यांच्या नेतृत्वाखालील व राज्यातील मुख्यमंत्री डॉ. प्रमोद सावंत यांच्या नेतृत्वाखालील भाजपचे सरकार गोव्यातील जनतेला सुशासन देण्यासाठी प्रयत्नशील आहे. राज्यात लोकाभिमुख निर्णय घेतले जात आहेत, तसेच गोव्याचा विकास देखील होत आहे. त्यामुळेच जनतेने भाजपला पुन्हा कौल दिला. राज्यातील अनेक महत्त्वपूर्ण प्रकल्पांचे काम अंतिम टप्प्यात पोहोचले आहेत, असेही त्यांनी सांगितले.