Goa: चिंबल (Chimbel) येथे होणाऱ्या वृद्धाश्रमाला (Old age home) चिंबल येथील स्थानिक लोक तसेच बिगर सरकारी संस्थानी विरोध दर्शवला आहे. एक वृद्धाश्रम असताना दुसऱ्या वृद्धाश्रम बांधण्यासाठी या भागातील झाडे कापुन पर्यावरणाचा ऱ्हास (Environmental degradation) करण्याचा सरकार (Goa Govt) प्रयत्न आहे. त्यामुळे लोकांच्या विरोधात जाऊन सरकारने प्रकल्प जबरदस्तीने सुरू केल्यास प्रकल्पाच्या विरोधात आंदोलन (Protest) करणार असल्याचा इशारा यावेळी चिंबलवासीयांनी दिला.

चिंबल येथे आधीच वृद्धाश्रम आहे, तोच सुस्थितीत नसल्याने बऱ्याच वृद्धांना इतर ठिकाणी स्थलांतरित करण्यात आले आहे. त्यामुळे अतिरिक्त वृद्धाश्रमाची गरज नाही. जो वृद्धाश्रम आहे त्याच वृद्धाश्रमाची डागडुजी करून तो व्यवस्थितरीत्या चालवावा. विनाकारण वृक्षतोड करून पर्यावरणाचा ऱ्हास करून, नवीन प्रकल्प उभारू नये, असे चिंबलवासीयांनी स्पष्ट शब्दात सांगितले आहे.

या प्रकल्पासाठी स्थानिक ग्रामस्थांकडून कोणताच प्रस्ताव नसून या​ प्रकल्पाविषयी जि. पं. सदस्य तसेच पंचायत सदस्यांना कोणतीच माहिती नाही. केंद्र सरकारचा हा प्रकल्प चिंबलवासीयांवर लादला जात आहे. सार्वजनिक सहाय्य संस्थेच्या लोकपालच्या संचालकांना विचारले असता ते या​विषयी कोणतेच उत्तर द्यायला तयार नाही. त्यामुळे या प्रकल्पाला आमचा विरोध आहे, असे बिगर सरकारी संस्था चिंबल मंचचे सचिव तुकाराम कुंकळकर यांनी सांगितले.