दाबोळी: गोवा पर्यटनाने २०२५-२६ हंगामाची उत्साहपूर्ण सुरुवात केली आहे. कझाकस्तानमधील अल्माटी शहरातून आलेल्या या हंगामातील पहिल्या चार्टर विमानाचे २५ ऑक्टोबर रोजी स्वागत करण्यात आले. SCAT एअरलाइन्सच्या (Flight SCAT VSV5212) या विमानाने सकाळी ५:३० वाजता दक्षिण गोव्यातील दाबोळी विमानतळावर लँडिंग केले.
या प्रसंगी पर्यटन मंत्री रोहन खौंटे म्हणाले की, “कझाकस्तानहून आलेल्या पहिल्या चार्टर विमानसेवेचे आगमन हे गोव्याच्या वाढत्या आंतरराष्ट्रीय कनेक्टिव्हिटीचे प्रतीक आहे. सरकार चार्टर नेटवर्कचा विस्तार करून स्रोत बाजारपेठांमध्ये विविधता आणण्यावर आणि शाश्वत पर्यटनाला चालना देण्यावर लक्ष केंद्रीत करत आहे.”
पर्यटन संचालक केदार नाईक यांनी सांगितले की, प्रत्येक नवीन चार्टर विमान गोव्याचे पसंतीचे पर्यटन स्थळ म्हणून स्थान अधिक बळकट करते. तसेच, दाबोळी आणि मोपा विमानतळांवर सुरळीत कामकाज सुनिश्चित करण्यासाठी प्रवासी भागीदार आणि भागधारकांच्या सातत्यपूर्ण प्रयत्नांचे त्यांनी कौतुक केले.
स्वागतासाठी गोवा पर्यटन विभागाने कॉनकॉर्ड एक्झॉटिक व्हॉयेजेस आणि टीटीएजी यांच्या सहकार्याने विशेष स्वागत सोहळा आयोजित केला. येणाऱ्या पाहुण्यांचे ब्रास बँड सादरीकरण, हार व पुष्पहारांनी स्वागत करण्यात आले. त्यानंतर चार्टर हंगामाच्या प्रारंभाचे प्रतीक म्हणून केक कापण्यात आला.
या उद्घाटन उड्डाणाने नवीन पर्यटन हंगामाची आशादायक सुरुवात झाली आहे. येत्या काही आठवड्यांत इतर आंतरराष्ट्रीय ठिकाणांहून अनेक चार्टर फ्लाइट्स येण्याची अपेक्षा व्यक्त केली जात आहे. “गोवा बियॉन्ड बीचेस” या उपक्रमांतर्गत पर्यटन विभाग सांस्कृतिक, साहसी, निरोगीपणा आणि वारसा पर्यटनाला विशेष प्रोत्साहन देण्यावर भर देत आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.