राज्यातील हवामानात सतत बदल जाणवत आहेत. नागरिकांना ऐन थंडीत उष्म्याच्या झळा सोसाव्या लागल्या, येत्या दोन-तीन दिवसात थंडीचा जोर अधिक वाढणार असून किमान तापमान २ ते ३ अंशांनी घसरण्याची शक्यता गोवा वेधशाळेने वर्तविली आहे. तसेच पहाटे व सकाळी काही भागात धुके दाटणार आहे.

आज पणजी येथे कमाल ३२.८ अंश सेल्सिअस तर किमान २१.० अंश सेल्सिअस तापमानाची नोंद करण्यात आली. राज्यात हळूहळू थंडीचा जोर वाढत जाण्याची शक्यता आहे. त्यामुळे नागरिकांनी आरोग्याची योग्य ती काळजी घ्‍यावी, असे आवाहन डॉक्टरांनी केले आहेत. पुढील चार-पाच दिवस हवामानात मोठे काही बदल घडणार नाहीत. त्यासोबतच वातावरण कोरडे राहणार आहे.

राज्यातील परतीच्या पावसाला उशीर झाला. त्यानंतर मान्सुनोत्तर कालखंडात पावसाची बरसात झाली. त्यामुळे यंदा थंडीला उशिरा सुरुवात झाली. मात्र, नंतर मंडूस आणि कमी दाबाच्या पट्ट्यामुळे थंडी कमी झाली आणि अजूनदेखील राज्यात म्हणावी तशी थंडी पडलेली नाही.

राज्यातील गेल्या 50 वर्षांतील हिवाळी तापमानाचा विचार करता सर्वाधिक उष्ण हिवाळा हा 2019 सालचा होता. गेल्या दोन वर्षांत हिवाळ्यात सामान्य तापमान होते. यंदादेखील तसे सामान्य तापमानच आहे.