पणजी: राज्यात दोन-तीन दिवसांपासून उष्म्याच्या झळा तीव्र झाल्या असून दिवसासोबतच रात्री मोठ्या प्रमाणात उष्मा जाणवत आहे. कमाल तापमानाचा पारा ३६.२ अंशांवर पोहोचला परंतु पुढील दोन दिवस राज्यातील तापमानाचा पारा घटणार असून कमाल तापमान ३३ ते ३४ अंशांवर जाण्याची शक्यता वेधशाळेने वर्तविली. काही भागात संध्याकाळी आणि रात्री ताशी ३० ते ४० किमी वाऱ्याच्या वेगाने पाऊस पडण्याची शक्यता आहे.

धारबांदोड्यात सर्वाधिक पाऊस

राज्यात मोठ्या प्रमाणात उष्मा वाढला होता परंतु शुक्रवारी पहाटे राज्यातील विविध भागात मोठ्या प्रमाणात अवकाळी पाऊस बरसला. धारबांदोड्यात सर्वाधिक १२.३ मिमी पावसाची नोंद करण्यात आली. त्या खालोखाल सांखळी ४.८ मिमी, मडगाव ४.४ मिमी, सांगे४.३ मिमी, म्हपास ४ मिमी, दाबोळी ३.६ मिमी, काणकोण ३.२ मिमी, जुने गोवा आणि फोंडा अनुक्रमे २.३ मिमी आणि मुरगाव येथे १.८ मिमी पावसाची नोंद करण्यात आली.

आंबा पिकाला तडाखा

राज्यात मोठ्या प्रमाणात बरसलेल्या अवकाळी पावसामुळे मोठ्या प्रमाणात सत्तरी, डिचोली परिसरात आंब्याच्या पीकाचे नुकसान झाले आहे. काही दिवसांनी उतरविण्यात येणारे हे आंबे जोरदार पडलेल्या पावसाच्या तडाख्याने नुकसान झाले आहे.

राज्यात अनेक ठिकाणी अवकाळी पाऊस पडल्याने हवेत गारवा आहे परंतु पुढील दोन-तीन दिवस राज्यात उष्मा जाणवेल तसेच संध्याकाळी आणि रात्री पाऊस पडण्याची शक्यता आहे.

- नहुष कुलकर्णी, संचालक, गोवा वेधशाळा.