Goa Winter Weather Update:

पणजी: राज्यात मागील काही दिवसांपासून सुरू असलेले हवामानातील बदल आता स्थिरावले असून मागील काही दिवसांपासून बऱ्यापैकी थंडी पडायला सुरवात झाली आहे. उपलब्ध नोंदींनुसार डिसेंबर महिन्यात १९७० साली किमान तापमानाचा पारा १८.०५ अंशांवर गेला होता. त्यानंतर मंगळवारी राज्यात १८.०६ अंश इतक्या किमान तापमानाची नोंद झाली.

जी मागील पन्नास वर्षांमधील डिसेंबर महिन्यामधील सर्वांत किमान तापमान आहे. यंदाच्या मॉन्सूनमध्ये पावसाने सर्व विक्रम मोडत नवे उच्चांक नोंदविले. तशीच स्थिती आता यंदाचा हिवाळादेखील नोंदविणार असल्याची शक्यता आहे. हवामान तज्ज्ञांच्या मते यंदा राज्यात बऱ्यापैकी आणि खूप काळ थंडी जाणवणार आहे. त्यामुळे निश्‍चितपणे यंदा थंडीचा जोर कायम राहण्याची अधिक शक्यता आहे.

राज्यात मागील काही दिवसांपासून पुन्हा थंडी पडायला सुरवात झाली असून यंदा हिवाळ्यात चांगली थंडी असणार आहे. मंगळवारी किमान तापमान १८.६ अंश सेल्सिअसवर येऊन पोहोचले आहे. त्यामुळे येत्या काळात अजून तापमान (Temperature) घटण्याची शक्यता नाकारता येत नाही.

- एम. आर. रमेशकुमार, शास्त्रज्ञ (निवृत्त) एनआयओ