पणजी: गोवा वेधशाळेने राज्यात आगामी आठवड्यात पावसाचा जोर वाढण्याची शक्यता वर्तविली आहे. विशेषतः १४ ते १७ ऑगस्टदरम्यान मुसळधार पावसाची शक्यता असल्याने ‘यलो अलर्ट’ जारी करण्यात आला आहे.

दरम्यान, रविवारी राज्याच्या अनेक भागांत हलक्या सरींची नोंद झाली. पणजी शहर आणि आसपासच्या परिसरात दिवसभर रिमझिम पाऊस आणि ढगाळ वातावरण कायम राहिले.

वेधशाळेने यापूर्वी ११ ते १४ ऑगस्ट या कालावधीत ‘ग्रीन अलर्ट’ घोषित केला होता. मात्र, हवामानातील बदलानुसार हे अलर्ट तासातासाने अद्ययावत केले जात असल्याने सोमवारी अलर्टमध्ये बदल होण्याची शक्यता आहे.

हवामान खात्याच्या माहितीनुसार, बंगालच्या उपसागरात निर्माण झालेल्या कमी दाबाच्या पट्ट्यामुळे पावसाची तीव्रता वाढू शकते. आपत्ती व्यवस्थापन प्राधिकरणाने नागरिकांना समुद्रकिनारी जाणे टाळण्याचे,

तसेच नद्यांच्या किनारी किंवा पुरग्रस्त भागात सावधगिरी बाळगण्याचे आवाहन केले आहे. शेती, मासेमारी आणि वाहतूक क्षेत्रांनाही हवामानातील बदलांसाठी सतर्क राहण्याचे निर्देश देण्यात आले आहेत.