पणजी: राज्यातील केवळ ९ टक्के लोकसंख्येलाच दिवसातून चार तासांपेक्षा कमी काळ पाणीपुरवठा मिळतो, असा दावा पेयजल विभागाचे मंत्री सुभाष फळदेसाई यांनी केला आहे. पुढील सहा महिन्यांत राज्यातील प्रत्येक ग्राहकाला सरासरी १२ तासांचा पाणीपुरवठा उपलब्ध करून देण्याचे आश्वासन त्यांनी दिले.
आल्तिनो येथे पेयजल खात्याच्या मुख्य कार्यालयाबाहेर पत्रकारांशी संवाद साधताना मंत्री फळदेसाई यांनी सांगितले की, सध्या राज्यात ३२५ दशलक्ष लिटर प्रतिदिन पाणी सार्वजनिक वापरासाठी उपलब्ध करून देण्यात येत आहे. त्यापैकी किमान ४० टक्के ग्राहकांना १८ तासांपेक्षा जास्त पाणीपुरवठा, तर २४ टक्के ग्राहकांना दिवसभर सतत पाणी मिळते. याशिवाय ४५ टक्के लोकांना दिवसातून आठ तास पाणी मिळत असल्याचेही त्यांनी स्पष्ट केले.
मंत्री म्हणाले की, विभागाने नुकत्याच झालेल्या आढावा बैठकीत अनेक बाबींचा ऊहापोह केला असून १५ दिवसांत सविस्तर अहवाल तयार केला जाईल. त्याआधारे पाणीपुरवठ्यातील कमतरता दूर करण्यासाठी वेगवेगळ्या उपाययोजना केल्या जातील. विशेषत: राज्यातील पाण्याच्या गळतीचे प्रमाण सध्या ४० टक्क्यांपर्यंत पोहोचले आहे. हे प्रमाण कमी करण्यासाठी ठोस पावले उचलण्याचे सरकारचे प्रयत्न असतील.
राज्यातील पाण्याच्या वाढत्या मागणीच्या पार्श्वभूमीवर पुढील काळात अधिक पाणी उपलब्ध करून देणे, गळतीतून होणारे नुकसान रोखणे आणि पुरवठा तासांमध्ये लक्षणीय वाढ करणे हे सरकारचे प्रमुख उद्दिष्ट असेल, असे फळदेसाई यांनी स्पष्ट केले.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.