फोंडा: राजधानीला पाणी पुरवणारी (Goa Water Supply) बाणस्तारी येथील जलवाहिनी फुटल्याने पाण्यासाठी या भागातील लोकांना बुधवारी वणवण करावी लागली. मंगळवार, 21 रोजी दुपारी साडेतीन वाजता ही जलवाहिनी फुटल्यानंतर मंगळवारी संध्याकाळी तसेच बुधवारी पूर्ण दिवस राजधानी आणि परिसरातील पाणीपुरवठा ठप्प झाला. विशेषतः बांबोळीतील इस्पितळावर याचा मोठा परिणाम जाणवला.

जलवाहिनीची (Water supply) दुरुस्ती युद्धपातळीवर करण्यात आली. मात्र जवळच आणखी एका ठिकाणी ती फुटल्याचे निदर्शनास आल्याने आता हे दुरुस्तीचे काम सुरू आहे. त्यामुळे गुरुवार, 23 तारखेपर्यंत पाणीपुरवठा होणार नसल्याचे या खात्याच्या अधिकाऱ्यांनी सांगितले. पणजी (Panjim), ताळगाव, सांताक्रूझ तसेच सांत आंद्रे वीज खात्याचे खांब उभारताना निष्काळजीपणा दाखवल्यामुळेच त्याचा फटका ग्राहकांना बसला आहे.

वीज खात्याचे (Electricity Department) खांब उभारताना संबंधित कंत्राटदाराने कोणतीच काळजी घेतली नाही. त्यामुळे जलवाहिनीला भोक पडले. वास्तविक वीज खात्याचे हे काम करताना योग्य ती खबरदारी घेण्याची आवश्‍यकता होती.

सरकारी काम कशाप्रकारे चालते, त्याचा हा उत्कृष्ट नमुना असून विपरित परिणाम झाल्यानंतर मात्र धावाधाव करावी लागली. विशेष म्हणजे राजधानी व बांबोळीला पाणीपुरवठा ठप्प झाल्याने लोकांचे बरेच हाल झाले. काही ठिकाणी तर पाण्याचे टँकर पुरवण्यात आल्याची माहिती उपलब्ध झाली.

विजेचे खांब बसवताना ड्रिल मशीन लागल्याने ही जलवाहिनी फुटली. ती रातोरात दुरुस्त केली. मात्र दुसऱ्या ‍ ठिकाणी परत जलवाहिनी फुटल्याने ही संपूर्णच जलवाहिनी बदलण्याचे काम सुरू आहे. गुरुवार सकाळपर्यंत हे काम पूर्ण होईल आणि गुरुवारीच नागरिकांना पाणी मिळेल.

-दीपक पाऊसकर

सार्वजनिक बांधकाम मंत्री