Vasco Accident: दाबोळी - चिखली सेंट अँथनी नीव चॅपेलजवळ अपघातास कारणीभूत ठरलेल्या साळगाव - बार्देश येथील 17 वर्षीय अल्पवयीन मुलाला वास्को पोलिसांनी वाहन कायद्याच्या विविध कलमाखाली गुन्हा नोंदवून त्याची मेरशी येथील ‘अपना घर’मध्ये रवानगी करण्यात आली आहे.

वाहन चालविण्याचा परवाना नसताना चुकीच्या बाजूने बेदकारपणे गाडी चालवून शुक्रवारी (ता. 25) दुपारी पावणे दोनच्या सुमारास दुचाकीला धडक देऊन झालेल्या अपघातात चिखली येथे राहणारी रीना गोन्साल्वीस (फर्नांडिस) हिचा मृत्यू झाला होता, तर तिच्या पाठीमागे दुचाकीवर बसलेला तिचा पुतण्या गंभीर जखमी झाला होता.

त्याला तातडीने चिखली उपजिल्हा इस्पितळात दाखल करण्यात आले होते. नंतर त्याला पुढील उपचारासाठी बांबोळी येथील गोवा वैद्यकीय इस्पितळात हलविण्यात आले. आज सकाळी त्याच्या पायावर यशस्वी शस्त्रक्रिया करण्यात आली.

43 वर्षीय रीना गोन्साल्वीस यांचा ज्या अपघातात मृत्यू झाला, त्या कारचा चालक अल्पवयीन होता आणि त्याच्याकडे वाहन चालविण्याचा परवाना नव्हता, अशी माहिती वास्को पोलिसांनी दिली.

वास्को पोलिसांनी दिलेल्या माहितीनुसार, अपघात झाला तेव्हा दुचाकीला धडक दिलेल्या कारमध्ये 4 प्रवासी होते. त्यात 2 मुले (ड्रायव्हरसह) आणि 2 मुली होत्या. त्यापैकी एक 18 वर्षांची मुलगी वास्को येथील असून उर्वरित 3 मुले बारावीत शिकणारी म्हापशातील आहेत.