पणजी: गोवा विद्यापीठाने शैक्षणिक वर्ष २०२६-२७ साठी पद्युत्तर पदवी आणि बी.एड. अभ्यासक्रमांच्या प्रवेश प्रक्रियेला सुरूवात झाली आहे. प्रवेशासाठीचे अर्ज केवळ ऑनलाइन पद्धतीनेच स्वीकारले जाणार असून इच्छुक उमेदवारांनी विद्यापीठाच्या अधिकृत संकेतस्थळाला भेट देण्याचे आवाहन विद्यापीठ प्रशासनाकडून करण्यात आले आहे.

प्रवेश प्रक्रिया, चाचणी व इतर संदर्भातील सविस्तर अधिसूचना विद्यापीठाने जारी केली आहे. या अधिसूचनेनुसार गोवा विद्यापीठातील पद्युत्तर पदवी (मास्टर) आणि बी.एडसाठी १८ फेब्रुवारीपर्यंत ऑनलाईन स्वरूपात अर्ज करता येणार आहे.

त्यानंतर ज्या विद्यार्थ्यांना आपले निवडलेले विषय बदलायचे असतील तर ते २५ आणि २६ फेब्रुवारीपर्यंत बदलता येणार आहे. प्रवेश चाचणी परीक्षा फेरी क्रमांक १ ही ७, ८, १४, १५ आणि २२ मार्च २०२६ या दरम्यान होणार आहे. गोवा विद्यापीठ आणि संलग्न महाविद्यालयांतील पदव्युत्तर तसेच बी.एड अभ्यासक्रमांसाठी प्रवेश हा चाचणीतील गुणांवर आधारित राहील.

तसेच बी.एडसाठी उच्च शिक्षण संचालनालयाने ठरविलेल्या इतर पात्रता निकषांची अट लागू असेल. मात्र, काही अभ्यासक्रमांना पात्रता चाचणी परीक्षा लागू राहणार नाही. सविस्तर माहिती, अभ्यासक्रमासाठीच्या एकूण जागा, आरक्षण व इतर तपशील विद्यापीठाच्या संकेतस्थळावर उपलब्ध असून, उमेदवारांनी अर्ज करण्यापूर्वी अधिसूचना काळजीपूर्वक वाचावी.