Goa Traffic: दुचाकीवरून तिब्बल सीट निघालेल्या कोलवा येथे वाहतूक पोलिसांनी अडवले. पण त्यांच्याकडे चौकशी केली असता पोलिसांना वेगळेच सत्य समजले आहे. या तिघांनाही पोलिसांनी ताब्यात घेतले आहे.

कोलावा येथे आज, गुरूवारी वाहतूक पोलिस उपनिरीक्षक आणि इतर कर्मचाऱ्यांनी GA 08 P 7472 ही दुचाकी थांबवली. या ग्लॅमर या दुचाकीवरून तिघे जण चालले होते. त्यांच्याकडे चौकशी केली असता पोलिसांना त्यांचा संशय आला. त्यामुळे त्यांच्याकडील मोटरसायकलचे तपशील पोलिसांनी तपासले.

त्यावरून या दुचाकीचा मूळ मालक कुणी दुसराच असल्याचे समजले. मूळ मालक असलेल्या आल्ड्रिन कुथिन्हो यांना पोलिसांनी फोन लावला. त्यांनी सांगितले की, त्यांची दुचाकी कार्मालाईट माँटेसरी येथून चोरीला गेली होती. कुथिन्हो तेथे प्रार्थनेसाठी गेले होते.

त्यानंतर पोलिसांनी या तिघा संशयितांची आणखी चौकशी केली असता त्यांनीच ही दुचाकी चोरल्याचे कबुली दिली. कुथिन्हो यांनी त्यांची मोटरसायकलची ओळख पटवली आहे. पुढील तपासासाठी संशयितांना वाहतूक पोलिसांनी मडगाव पोलिसांच्या ताब्यात दिले आहे.

कोलवा वाहतूक पोलिस, पोलिस उपनिरीक्षक देवू, पोलिस उपनिरीक्षक हरिश देसाई, सहाय्यक उपनिरीक्षक गावडे, हेड कॉन्स्टेबल हेमंत, कॉन्स्टेबल राफेल, शिवानंद, राऊत, सुनील यांचा या वाहतूक पोलिसांच्या पथकात समावेश होता.