मडगाव: गोव्यातील समुद्रकिनाऱ्यांवर वाहन प्रवेशास कडक बंदी असतानाही काही पर्यटक नियमांचे उल्लंघन करताना आढळून येतात. अशाच प्रकारचा एक प्रकार शुक्रवारी सकाळी उघडकीस आला. रेंट अ जीप घेऊन बाणावली समुद्रकिनाऱ्यावर गेलेल्या एका गुजराती पर्यटकाला कोलवा किनारी पोलिसांनी पकडून पाच हजार रुपयांचा दंड ठोठावला.

जयेशकुमार पटेल (वय ५७, मूळ गुजरात) असे त्या पर्यटकाचे नाव असून तो आपल्या पत्नीसमवेत गोव्यात आला होता. शुक्रवारी सकाळी साडेसातच्या सुमारास त्यांनी भाड्याने घेतलेली जीप थेट किनाऱ्यावर नेली. या दरम्यान गस्तीवरील किनारी पोलिसांनी त्याला अडवून चौकशी केली. चौकशीत त्याने गुगल मॅपचा आधार घेऊन आपण या ठिकाणी आलो असल्याचे सांगितले.

मात्र, गोव्यात किनाऱ्यावर कोणतेही वाहन आणण्यास मनाई असल्याचे स्पष्ट करत पोलिसांनी त्याला नियमांची माहिती दिली. त्यानंतर पर्यटकावर दंडात्मक कारवाई करत ५,००० रुपयांचा दंड वसूल करण्यात आला.

या घटनेमुळे पुन्हा एकदा समुद्रकिनाऱ्यांच्या सुरक्षेसंबंधी प्रश्न उपस्थित झाले आहेत. पर्यटकांकडून वारंवार नियमभंग होत असल्याने स्थानिक नागरिकांत नाराजी आहे. किनाऱ्यावरील नैसर्गिक सौंदर्य आणि पर्यावरण संरक्षित ठेवण्यासाठी अशा घटनांना आळा घालणे गरजेचे असल्याचे नागरिकांनी सांगितले.

दरम्यान, पोलिसांनी सर्व पर्यटकांना आवाहन केले आहे की, समुद्रकिनाऱ्यावर वाहन घेऊन जाणे हा कायद्याने गुन्हा असून त्याबाबत कुठलीही सबब ग्राह्य धरली जाणार नाही. पर्यटकांनी गुगल मॅप किंवा इतर साधनांवर अवलंबून न राहता स्थानिक प्रशासनाने दिलेल्या सूचना आणि नियमांचे पालन करणे आवश्यक असल्याचेही पोलिसांनी स्पष्ट केले.