Goa Tourism: पर्यटनाच्या आघाडीवर पुढील सहा महिने गोव्यासाठी महत्त्वाचे आहेत. यंदाचा पर्यटन हंगाम खरोखरच चांगला असेल याची खात्री आहे. कोरोनाच्या दोन वर्षानंतर राज्यात मोठ्या संख्येने देशी व विदेशी पर्यटक येणार अशी आशा आहे. याशिवाय गोव्याला समुद्री पर्यटन मिळणार असून सुमारे 60 क्रूझ जहाज अपेक्षित आहेत, असे माहिती पर्यटनमंत्री रोहन खंवटे यांनी दिली. पणजी येथे ते पत्रकारांशी बोलत होते.

कोरोना महामारीमुळे गेले दोन पर्यटन हंगाम वाया गेले असून विदेशी पर्यटक आले नव्हते. त्यासाठी हा हंगाम पर्यटन उद्योगासाठी महत्त्वाचा आहे. गेल्या दोन वर्षांत समुद्री पर्यटन बंद असल्याने एकही जहाज राज्यात आला नव्हता.

मुख्यमंत्री डॉ. प्रमोद सावंत राज्यात साधन सुविधा निर्माण करून दर्जेदार पर्यटन गोव्याला लाभणार यासाठी प्रयत्नशील आहेत. यासाठी चांगल्या सेवा देखील दिल्या जात आहेत. पर्यटन मंडळाच्या मदतीने, तसेच पर्यटन उद्योगातील घटकांना सोबत घेऊन यंदाचा हंगाम ठेरणार आहे, अशी आशा खंवटे यांनी व्यक्त केली.

‘गोवा ही देशातील भोजनाची राजधानी’

गोव्यात आता केवळ सौंदर्याला आकर्षित होऊन पर्यटक येत नसून देशातील भोजनाची राजधानी म्हणून गोवा प्रसिद्ध झाला आहे. जेवणाशीसंबंधित फूड ब्लोगर्स आणि प्रसार माध्यमांवर कार्यक्रम करणारे व्यक्ती आज गोव्यात येऊन येथील पाककृती दाखवतात. त्यामुळे आणखी पर्यटक राज्यात येत आहेत, असे खंवटे म्हणाले.