डिचोली: यंदा श्री लईराई देवीच्या जत्रोत्सवात ‘मोगरी’च्या फुलांची अपेक्षेप्रमाणे आवक झाली नव्हती. उलट ‘चेंगराचेंगरी’च्या दुर्घटनेनंतर फुलांच्या विक्रीवरही मोठा परिणाम झाला.

जत्रेपूर्वीच फूलविक्रेत्यांकडे मोगरीच्या फुलांचा भार झाला होता. जत्रेच्या दहा-ते बारा दिवस आधी बाजारात ‘मोगरी’च्या फुलांचा खच पडत होता. अवकाळी पाऊस त्यातच उष्णता वाढल्याने ‘मोगरी’चा बहर वाढला होता.

दरम्यान, आज (मंगळवारी) कौलोत्सवाच्या शेवटच्या दिवशी गावाबाहेरील भाविकांना गावात बंदी घालण्याचा निर्णय घेतल्याने यंदा ‘मोगरी’ला मोठीशी मागणी असणार नाही. अन्य वर्षांच्या तुलनेत यंदा मोगरी विक्रीतून आर्थिक उलाढालीवरही जवळपास ५० टक्के घट अपेक्षित आहे.

दरम्यान, जत्रा ते कौलोत्सवपर्यंत शिरगावात मोगरीच्या कळ्यांना प्रचंड मागणी असते. दरवर्षी जत्रा काळात गोव्यासह शेजारच्या राज्यांतून मोगरीच्या फुलांची मोठी आवक होत असते. जत्रा काळात शिरगावात मोगरीच्या फुलांचा दरवळ पसरत असतो.

मोगरीच्या फुलांना असलेली मागणी पाहता, जत्रा काळात शिरगावात मोगरी फुलांच्या विक्रीतून लाखो रुपयांची उलाढाल होत असते. मात्र, यंदा मोगरीचा तुटवडा आणि दुर्घटनेमुळे झालेला परिणाम, यामुळे यंदा मोगरी विक्रीवर मोठा परिणाम झाला.

मोगरी देवीला प्रिय

शिरगावची श्री लईराई देवी म्हटली की, सुवासिक मोगरीच्या कळ्यांची आठवण येते. मोगरीचे कळे श्री लईराई देवीला प्रिय, अशी प्रत्येक भक्तांची भावना आहे. म्हणूनच देवीच्या दर्शनासाठी जाणारा प्रत्येक भाविक मोगरीचे कळे देवीच्या चरणी अर्पण करतात.

काही भक्तगण नवस बोलल्यानुसार ठरावीक कळ्यांच्या माळा देवीला अर्पण करतात. जत्रेदिवशी धोंड भक्तगणही मोगरीच्या माळा गळ्यात घालतात.