एप्रिलमध्ये सर्वाधिक ३६.२ अंश तापमान

पणजी : राज्यात यंदा एप्रिलमधील सर्वाधिक कमाल 36.2 अंश सेल्सिअस एवढ्या तापमानाची नोंद झाली. यापूर्वी 7 एप्रिल 1989 रोजी पणजी येथील सर्वाधिक तापमान 39.8 अंश सेल्सिअस इतके होते. (Goa Temperature rose to more than 36 degrees Celsius in April)

पणजीचे कमाल तापमान एप्रिलमध्ये तीन दिवस 35 अंश सेल्सिअसपेक्षा अधिक होते. एप्रिल 2012 मध्ये 9 दिवस कमाल तापमान 35 अंशांपेक्षा अधिक होते. यंदाच्या एप्रिलमध्ये 4 दिवस पणजीचे किमान तापमान 27 अंश सेल्सिअसपेक्षा अधिक होते. एप्रिलमध्ये सर्वाधिक किमान तापमान 27 अंश सेल्सिअसपेक्षा अधिक एप्रिल 1973 मध्ये 18 दिवस होते. शनिवारी पणजी येथे सर्वाधिक कमाल 34.2 अंश सेल्सिअस, तर किमान 28 अंश सेल्सिअस तापमानाची नोंद झाली.

शनिवारी तापमान कमी असले, तरी हवेतील आर्द्रता वाढल्यामुळे उष्म्याचे प्रमाणही वाढले होते. त्यामुळे लोकांच्या अंगातून घामाच्या धारा वाहात होत्या. शनिवारी राज्यात 79 टक्के आर्द्रतेची नोंद झाली. तापमान जरी वाढले नसले, तरी हवेतील बाष्पाचे प्रमाण वाढल्यामुळे उष्म्यात वाढ होऊन लोक घामाघूम झालेले दिसत होते.