Taxi Driver Attacked In Goa

थिवी येथे प्रवाशाकडून टॅक्सी चालकावर सुरी हल्ला केल्याची गंभीर घटना समोर आली आहे. यात टॅक्सी चालक जखमी झाला असून, त्याला उपाचारासाठी गोवा वैद्यकीय महाविद्यालयाच्या रुग्णालयात दाखल करण्यात आले आहे. तर, कोलवाळ पोलिसांनी संशयित प्रवाशाला अटक केलीय.

मिळालेल्या माहितीनुसार, सुभाष सावंत यांच्या प्रवासी टॅक्सीमध्ये एक प्रवासी बसला. पुढे जाऊन त्याने त्याचा आणखी एक मित्र येणार असल्याचे सांगत टॅक्सी रस्त्याकडेला थांबविण्याची विनंती केली. चालक सावंत विनंतीवरुन रस्त्याकडेला थांबले असता, प्रवाशाने त्यांच्यावर सुरी हल्ला केला.

यात टॅक्सी चालक सावंत यांच्या मानेवर डोक्यात आणि कपाळावर गंभीर जखम झाली आहे. कोलवाळ पोलिसांनी याप्रकरणी संशयित प्रवासी लेनी पीटर सीमॉईस याला अटक केली असून, पुढील तपास सुरु आहे.

अधिक भाडे मागणीवरुन झाला वाद?

टॅक्सी चालकाने प्रवाशाकडे अधिक भाडे मागितले त्यामुळे दोघांमध्ये वाद झाला असा दावा यावेळी उपस्थित काही प्रत्यक्षदर्शीनी व्यक्त केला आहे. तर, अगाऊ पैशांची मागणी केलीच नाही, असे टॅक्सी चालकाने म्हटले आहे.

दरम्यान, पोलिसांनी संशयित हल्लेखोर प्रवाशाला अटक केली असून, अधिक तपास सुरु आहे.