MLA Disqualification Petition: सप्टेंबर 2022 मध्ये काँग्रेसमधून भाजपमध्ये पक्षांतर केलेल्या 8 आमदारांसह सभापती रमेश तवडकर यांना आज सर्वोच्च न्यायालयाने नोटिसा बजावल्या आहेत. डिसेंबरच्या पहिल्या आठवड्यापर्यंत आपले मत मांडण्याचे निर्देश न्यायालयाने दिले आहेत.
काँग्रेसमधून 15 सप्टेंबर 2022 रोजी दिगंबर कामत, मायकल लोबो, दिलायला लोबो, संकल्प आमोणकर, राजेश फळदेसाई, केदार नाईक, आलेक्स सिक्वेरा आणि रुडॉल्फ फर्नांडिस यांनी पक्षांतर करून भाजपमध्ये प्रवेश केला होता.
या फुटीर आमदारांच्या विरोधात काँग्रेसचे माजी प्रदेशाध्यक्ष गिरीश चोडणकर यांनी दाखल केलेल्या अपात्रता याचिकेवर सभापती तवडकर यांनी निर्णय न घेतल्याने चोडणकर यांनी सर्वोच्च न्यायालयात याचिका दाखल केली होती.
ही याचिका न्यायमूर्ती संजीव खन्ना आणि न्यायमूर्ती एस.व्ही.एन. भट्टी यांच्या खंडपीठासमोर आज सुनावणीस आली होती. यावर प्रतिवादींना नोटीस बजावून डिसेंबर महिन्याच्या पहिल्या आठवड्यापर्यंत मत मांडण्यास सांगितले आहे. या पक्षांतरामुळे विधानसभेतील काँग्रेसचे संख्याबळ ११ वरून घसरून ३ वर आले आहे, तर भाजपचे संख्याबळ २० वरून २८ झाले आहे.
तवडकर यांच्याकडून नोटिसाही नाहीत
उच्च न्यायालयाने 2 मे 2023 च्या निकालात सभापती रमेश तवडकर यांनी अपात्रता याचिकेवर जलदगतीने निर्णय घ्यावा, असे नमूद केले होते आणि या याचिकांवर तीन महिन्यांत निर्णय घ्यावा लागेल, असे म्हटले होते. तरीही अपात्रतेची ही याचिका पुढे सरकलेली नाही. प्रत्यक्षात आजपर्यंत सभापतींनी संबंधित आमदारांना याप्रकरणी नोटिसाही बजावलेल्या नाहीत.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.