Vishwajit Rane : नवजात बाळांची काळजी घेण्यामध्ये गोवा भारतामध्ये आघाडीवर असून 2008 मध्ये भारतातील पहिला सर्व समावेशक अर्भकांचे स्क्रीनिंग कार्यक्रम सुरू झाला. या कार्यक्रमाच्या सुरुवातीपासून सरकारच्या रुग्णालयामध्ये जन्मलेल्या 83 हजार हून अधिक नवजात बाळांना या योजनेचा लाभ घेता आला आहे, अशी माहिती आरोग्यमंत्री विश्‍वजीत राणे यांनी दिली.

या उप्रकमा संदर्भात ‘निओजेन’च्या थॉमस यांच्याशी सविस्तर चर्चा करण्यात आली आहे. हा कार्यक्रम यापुढे अधिक कार्यक्षम पद्धतीने राज्यात कसा राबवता येईल, यासाठी प्रयत्न केले जाणार असल्याचे मंत्री विश्वजीत राणे यांनी सांगितले.

2018 पासून सुरू झालेल्या 2.0 या कार्यक्रमात जवळपास 36 हजार अर्भकांची तपासणी करण्यात आली. त्यापैकी 142 अर्भकांना गंभीर विकार असल्याचे आढळून आले. या स्क्रीनिंगमुळे त्यांच्यावर वेळेत उपचार करण्यात आले. एनबीएस यांच्या प्रयत्नामुळे भारतात एक मॉडेल म्हणून आणि विकसनशील देशात अग्रगण्य कार्यक्रम म्हणून या उपक्रमाला जगभरात मान्यता मिळाली आहे.